किभ- युक्रेन भ्रमणमा रहेका अमेरिकी विदेश मन्त्री एन्टोनी ब्लिंकेनले रुसविरुद्ध लड्न दुई अर्ब डलरबराबरका हतियार पठाउने घोषणा गरेका छन्।
युक्रेन मात्र नभई पूरै युरोपमा रुसको खतरा बढेको उल्लेख गर्दै ब्लिंकेनले उक्त परिमाणको हतियार सहायता घोषणा गरेका हुन्। उनी बिहीबार अचानक युक्रेनको राजधानी किभ पुगेका छन्।
युक्रेन सरकारका वरिष्ठ अधिकारीहरूसँगको बैठकपछि उनले उक्त घोषणा गरेका हुन्। उक्त हतियार युक्रेनसहित उसका छिमेकी १८ वटा मुलुकमा पठाइने उनले बताए।
उनका अनुसार उक्त हतियार युक्रेनसहित भविष्यमा रुसको आक्रमणको खतरा रहेका अन्य मुलुकहरूलाई दिइन लागेको हो। जर्मनी भ्रमणमा रहेका अमेरिकी रक्षामन्त्री लोयड अस्टिनले बिहीबार नै युक्रेनलाई ठूलो परिमाणमा हतियार, गोला बारुद र बख्तरबन्द गाडीहरू दिइन लागेको बताएका थिए। उक्त सहायता ६७ करोड ५० लाख डलरबराबर हुन आउने उनको भनाइ थियो।
उक्त प्याकेजमा होभित्जर, तोपखाना, हाई मोबिलिटी मल्टिपर्पोज भेहिकल, हतियारबन्द एम्बुलेन्स, एन्टी ट्यांक सिस्टमलगायत समेटिएका छन्।