काठमाडौं- संघीय संसदले नागरिकता विधेयक जस्ताको तस्तै पारित गरेर प्रमाणीकरणका लागि राष्ट्रपति कार्यालय पठाएको छ।
प्रतिनिधिसभा र राष्ट्रियसभाबाट जस्ताको तस्तै पारित भएको विधेयक सोमबार अपराह्न साढे ५ बजे प्रमाणीकरणका लागि राष्ट्रपति कार्यालय पठाइएको हो। यसअघि पारित भएको विधेयक राष्ट्रपति विद्यादेवी भण्डारीले पुनर्विचारका लागि संघीय संसदमा फिर्ता पठाएकी थिइन्। संसदका दुवै सदनले उक्त विधेयक जस्ताको तस्तै पारित गरेका हुन्।
सभामुख अग्निप्रसाद सापकोटाले सोमबार प्रमाणित गरेर विधेयक प्रमाणीकरणका लागि राष्ट्रपति कार्यालय पठाइएको हो। राष्ट्रपतिबाट प्रमाणीकरण भएपछि विधेयकले कानूनको रूप पाउँछ।
नेपाल नागरिकता ऐन, २०६३ लाई संशोधना गर्न बनेको विधेयक प्रतिनिधिसभा र राष्ट्रिय सभाबाट पारित भएपछि राष्ट्रपति भण्डारीले पुनर्विचार गर्नुपर्ने भन्दै संसद्मा फिर्ता गरेकी थिइन्। राष्ट्रपति भण्डारीले आफूलाई प्राप्त विधेयक १४ दिन अध्ययन गरेर साउन २९ गते संसद्मा नै फिर्ता गरेकी थिइन्। संघीय संसदबाट दोस्रोपटक पारित भएर आएको विधेयक राष्ट्रपतिले १५ दिनभित्र प्रमाणीकरण गर्नैपर्ने संवैधानिक बाध्यता छ।