काठमाडौं – स्कुल–कलेजका विद्यार्थी सुरक्षा लक्षित चेकिङ अन्तरगत आइतबार मादक पदार्थ सेवन गरेर स्कुल बस चलाउने पाँच जना चालकलाई ट्राफिक प्रहरीले कारबाही गरेको छ ।
बिहान साढे ५ बजेदेखि साढे ८ बजेसम्म गरिएको चेकजाँचमा मापसे गरेका चालक कारबाहीमा परेका हुन् ।
मापसे गरेर स्कुल बस चलाउने चालकहरूमा काठमाडौंको कलंकीस्थित एल.आर. आई स्कुलको बागमती प्रदेश ०१–००३ क ९१ ५७ नम्बरको बसका चालक राजकुमार पण्डित, धोविघाट स्थित आइडल मोडेल स्कुलको बा५क ९७ ९८ नम्बरको बसका चालक राजेश थापा रहेका छन् ।
यस्तै, आइडल मोडेलकै बा१क ६४१६ नम्बरको अर्को बसका चालक कृष्णबहादुर सुनार, तीनकुने स्थित कौटिल्या स्कुलको प्रदेश ३–०१–०३३ च ९९७ नम्बरको बसका चालक गणेश भण्डारी र चोभार स्थित मोर्डेन इन्डियन स्कुलको बा३क ४६ १६ नम्बरको बसका चालक घना दोर्जे लामा कारबाहमा परेका छन् ।
मापसे गरेर स्कुलका सवारी साधन चलाएका चालकलाई नियन्त्रणमा लिई नियम अनुसार कारबाही गरेर सम्बन्धित स्कुललाई जानकारी गराई अर्को चालकमार्फत विधार्थीहरुलाई गन्तव्यमा पठाइएको काठमाण्डौं उपत्यका ट्राफिक प्रहरी कार्यालयका प्रवक्ता एवं प्रहरी वरीष्ठ उपरीक्षक राजेन्द्र प्रसाद भट्टले जानकारी दिए ।
चेकिङकै क्रममा अन्य ट्राफिक नियम उल्लंघन गर्ने १२ जना चालकलाई पनि ट्राफिक प्रहरीले कारबाही गरेको छ ।
ट्राफिक प्रहरीले साउन ३० गतेबाट सुरू गरेको स्कुल–कलेजका विद्यार्थी सुरक्षा लक्षित चेकिङ अभियान अन्तरगत मापसे गरि सवारी साधन चलाउँदै गरेका ३१ जना स्कुल बसका चालकलाई हालसम्म कारबाही गरिसकेको प्रवक्ता वरिष्ठ उपरीक्षक भट्टले बताए ।