बारा । जिल्लाको जितपुरसिमरा उपमहानगर २३ भलुहीमा प्रहरी र चोरबीच भएको दोहोर भिडन्त भएको छ । मध्यराति करिब १२ बजे एरोटेक प्रा.लि.मा दोहरो भिडन्त भएको हो ।

एरोटेक प्रा.लि. सिलिण्टर कम्पनीमा चोरहरूको समूहले लुटपाट गरिरहेको सूचना पाएलगतै घटनास्थलमा प्रहरी पुगेको थियो । करिब २० जनाको समूहमा आएका चोरले उद्योगभित्र लुटपाट गरिरहेका बेला प्रहरी र डाँकाबीच दोहोर भिडन्त भएको हो ।

दोहोर भिडन्तमा डाँकाले एक राउण्ड र प्रहरीले तीन राउण्ड गोली चलाएको बाराका प्रहरी उपरीक्षक होबिन्द्र बोगटीले जानकारी दिए । डाकाले चार राउण्ड फायर गरे पनि ३ राउण्ड नपड्केको र एक राउण्ड पड्केको थियो ।

प्रहरीले दोहोरो भिडन्तको क्रममा कटुवा पेस्तोल १ थान, एकनाले बन्दुक १ थान र गोली ३ थानसहित २ जना चोरलाई पक्राउ गरेको छ । प्रहरीले जितपुरसिमरा उपमहानगर ९ छातापिपरा बस्ने जयराम पासवान र वडा नम्बर १० बलुवाबेहरा बस्ने जवाहिर महतोलाई पक्राउ गरेको बाराका प्रहरी उपरीक्षक बोगटीले जानकारी दिए ।

दोहोरो भिडन्तको क्रममा वरिष्ठ प्रहरी नायव निरिक्षक (सई) कलाम शाही घाइते भएका छन् । चोर पक्रने क्रममा डाँकाले प्रहार गरेको रडबाट शाही घाइते भएका हुन् ।

घाइते वरिष्ट प्रहरी नायव निरिक्षक शाहीको वीरगञ्ज हेल्थ केयरमा उपचार भइरहेको जील्ला प्रहरी कार्यालय बाराले जनाएको छ । यता दोहरो भिडन्तमा घाइते एक जना चोरको अलपाइन अस्पताल सिमरामा उपचार भइरहेको जनाइएको छ ।