महेन्द्रनगर- नेपाल, भारत र चीनसितको त्रिदेशीय नाका तिंकरसम्म व्यापार विस्तारका लागि अघि बढाइएको महाकाली करिडोर सडक निर्माण योजनाको प्रगति कछुवा गतिमा छ। ०६६ सालदेखि थालनी भएको निर्माण १२ वर्ष बितिसदा ३० किलोमिटर सडक मात्रै कालोपत्रे भएको छ।
उक्त योजनाको सुरुआत विन्दु कञ्चनपुरको ब्रह्मदेव क्षेत्रमा कामका लागि ठेक्का भए पनि रुख कटानको प्रक्रियाले काम नै शुरु हुन सकेको छैन। कञ्चनपुरको ब्रह्मदेवदेखि डडेल्धुरा, बैतडी र दार्चुलाको तिंकरसम्म सडक खुलाउने उक्त योजनाअन्तर्गत ४१३ कीमी सडक पर्ने धेरै क्षेत्र रुख कटानको अल्झनमा छ। महाकाली करिडोर दार्चुला तिंकर सडक योजनाका इन्जिनियर मिलन घतानीले करिडोर निर्माणअन्तर्गत सबैतिर ट्रयाक खोल्ने काम भइरहेको जानकारी दिए। कञ्चनपुरको ब्रह्मदेवदेखि उत्तर डडेल्धुराको जोगबुढा क्षेत्रसम्म १५ कीमी ट्रयाक खोल्न गत वर्ष असारमा पाँच करोड ५० लाख रुपैयाँमा ठेक्का सम्झौता भए पनि काम भने हुन सकेको छैन।
उक्त क्षेत्रको ट्रयाक खोल्ने काम दिवा-शनिदेव जेभीले पाएको थियो। दिवा–शनिदेव जेभीका सञ्चालक देवीदत्त भट्टले रुख कटानको आदेश नभएकाले एक वर्षदेखि आफूले काम गर्न नपाएको गुनासो पोखे। ‘रुख कटानको आदेश आएको भए अहिलेसम्म धेरै काम भइसक्थ्यो,’ उनले भने, ‘अब चाँडै आदेश आउछ भन्नेमा आशावादी हुनेबाहेक अरू केही छैन।’
करिडोरअन्तर्गत कञ्चनपुर क्षेत्रमा मात्रै एक हजार ९५१ रुख कटान गर्नुपर्नेछ। उक्त १५ कीमी ट्रयाक ०८० सालभित्र खोलिसक्नुपर्ने भए पनि निर्माण पक्षले एक वर्ष काम गर्न पाएन। त्यसैगरी ३० महिनामा निर्माण गरी कञ्चनपुरको हुलाकी सडक दोब्बर समय सकिँदा पनि निर्माण अधुरै छ। यहाँको डोके बजारदेखि बेलौरी हुँदै दैजीसम्म ६२ कीमी सडक निर्माणका लागि फागुन ०७३ मा निर्माणको जिम्मा दिइएको थियो। तर, हालसम्म ३४ कीमी सडक मात्रै कालोपत्रे भएको हुलाकी राजमार्ग आयोजना कार्यालय धनगढीका सूचना अधिकृत इन्जिनियर पदमबहादुर मडैले जानकारी दिए।
उनका अनुसार तीन प्याकेजमा दिइएको ठेक्कामा कूल २८ कीमी सडक कालोपत्रे गर्न बाँकी छ। निर्माणमा ढिलाइ गर्ने ठेकेदार कम्पनीलाई कारवाही प्रक्रिया थाल्ने चेतावनी दिइए पनि अन्ततः पाँचाँै पटक निर्माणको म्याद थप भएको छ। ‘डोकेबजारदेखि बेलौरीसम्मको प्याकेजमा आगामी मंसिर र बाँकी दुई प्याकेजमा असारसम्मकै समय दिइएको छ,’ उनले भने, ‘कोरोना कहरलगायत कारणले पनि निर्माणको समय लम्बियो।’
राससबाट