काठमाडौँ । नेकपा माओवादी केन्द्रले कर्णाली प्रदेशका आफ्ना सबै सांसदलाई मन्त्रीको भाग पुर्याएको छ । कर्णालीमा माओवादीका ११ सांसद छन् ।
सुरुमा, माओवादीबाट कर्णालीमा १३ सांसद थिए । तीमध्ये ठम्मर बिष्ट र धर्मराज रेग्मी एमाले प्रवेश गरेपछि पदमुक्त भए । एक गैरसांसदसहित ११ जनालाई माओवादीले मन्त्री बनाएको छ । कर्णाली प्रदेशसभाका सभामुख राजबहादुर शाही पनि माओवादी केन्द्रबाटै चुनाव जितेका नेता हुन् ।
माओवादीबाटै जितेकी पुष्पा घर्ती ‘सपना’ प्रदेशसभामा उपसभामुख छिन् । मन्त्री भएका सांसदहरूमा महेन्द्रबहादुर शाही (पूर्वमुख्यमन्त्री), नरेश भण्डारी, सीता नेपाली, विमला केसी, बिन्दमान बिष्ट, गोपाल शर्मा, गणेशबहादुर सिंह, वीरबहादुर शाही रहेका छन् । गैरसांसद छिरिङ दमदोल लामा (कार्चेन)लाई पनि माओवादीले मन्त्री बनाएको छ ।
हालसम्म मन्त्री बन्न बाँकी थिए, रुकुम पश्चिमका रातो कामी र जाजरकोटकी कृष्णा शाह । उनीहरूलाई पनि मन्त्री बनाउन शुक्रबार माओवादीले मुख्यमन्त्री जीवनबहादुर शाहीसमक्ष सिफारिस गरेको छ । सांसदहरू कामी र शाहलाई मन्त्री बनाउन जलस्रोत तथा ऊर्जा विकासमन्त्री गणेशबहादुर सिंह र आर्थिक मामिला तथा योजनामन्त्री बिन्दमान बिष्टलाई माओवादीले फिर्ता बोलाएको छ ।
पछिल्लोपटक सांसदद्वय कामी र शाहलाई मन्त्री बनाउनुको कारण आफ्नै प्रकारको छ । कर्णालीको मन्त्रिपरिषद समावेशी नभएको उल्लेख गरी परेको रिटमा सुनुवाइ गर्दै सुर्खेत उच्च अदालतले समावेशी बनाउन आदेश जारी गरेको थियो ।
अदालतको सोही आदेश कार्यान्वयन गर्न कामी र शाहीलाई मन्त्री बनाउने तयारी गरिएको हो । शाह योजनामन्त्री र कामी ऊर्जा विकासमन्त्री बन्दै छन् ।