काठमाडौँ । विवेकशील साझा पार्टीका पूर्वअध्यक्ष रविन्द्र मिश्रले नेपाली कांग्रेसलाई सुझाव दिएका छन् । उनले देशको दूरगामी हित चाहँदै मार्ग परिवर्तन गर्न कांग्रेसलाई सल्लाह दिएका हुन् ।
उनले आफ्नो सामाजिक सञ्जाल फेसबुकमार्फत कांग्रेसले जति छिटो ‘मार्ग परिवर्तन’ गर्यो त्यति छिटो कांग्रेस र देशको भलो हुने बताएका छन् । उनले यो नै दूरगामी हित हुने दाबी गरेका छन् ।
आगामी संघ र प्रदेशसभा निर्वाचनमा गठबन्धन गरेको भन्दै उनले हिजो आफ्नै नेताको घाँटी रेट्ने र हातखुट्टा भाँच्नेहरूको कांग्रेसले वैशाखी टेकिरहेको आरोप लगाएका छन् ।
‘देशको हितमा कांग्रेसलाई सल्लाह !, यदि, कांग्रेसले ‘बीपी राजमार्ग’ नछोडेको र बीपी कोइरालाको पुस्तक गाउँगाँउसम्म पुर्याएको भए आज कांग्रेसले चुनाव जित्न आफ्नै सदस्य तथा नेताको घाँटी रेट्ने र हातखुट्टा भाँच्नेहरूको वैशाखी टेक्नु पर्ने थिएन,’ उनले भने, ‘पाँच–छ वटा पार्टीको गठबन्धन गर्दा नि एक्लो एमालेसँग चुनाव हारिएला भनेर डराउनु पर्ने थिएन ।’
उनले कांग्रेसले कसै न कसैको वैशाखी टेकिरहनु पर्ने अवस्था आउने दाबी गर्दै यसले देशलाई घाटा गर्ने बताए ।
पूर्व पत्रकारसमेत रहेको उनी नयाँ राजनीतिक शक्तिको खोजीमा विभिन्न नयाँ पार्टी खोल्दै नेतृत्वमा बसेर काम गरेका थिए । पछिल्लोपटक विवेकशील साझा पार्टीको अध्यक्ष रहेका उनी स्थानीय निर्वाचनमा पार्टीले नराम्रो हार बेहोरेपछि पदबाट राजीनामा दिएका थिए ।