काठमाडौं- तीन वर्षदेखि क्यान्सरबाट पीडित गायिका स्मिता घिमिरेको सोमबार निधन भएको छ।

ललितपुर हरिसिद्धिस्थित क्यान्सर अस्पतालमा उपचारका क्रममा सोमबार साँझ उनको निधन भएको पारिवारिक स्रोतले जनाएको छ। उनी पछिल्लो समय बोनम्यारोको क्यान्सरबाट पीडित थिइन्।

उनले थुप्रै नेपाली गीतमा स्वर दिएकी छन्। केही समयअघि उनको उपन्यास ‘हराएको मुस्कान’ सार्वजनिक भएको थियो।

उनी पूर्वप्रधानमन्त्री मातृकाप्रसाद कोइरालाकी छोरी सविता अर्यालकी छोरी हुन्। उनी बाल्यकालदेखि नै गीत–संगीततिर आकर्षित भएकी थिइन्। उनकी आमाको पनि क्यान्सरबाटै निधन भएको थियो। स्मितालाई अढाइ वर्षअघि पनि स्तन क्यान्सर देखिएको थियो। शल्यक्रियापछि स्तन क्यान्सर जितेकी उनलाई फेरि बोनम्यारो क्यान्सरले सताएको थियो।