नयाँदिल्ली- भारतीय एयरलाइन्सहरूमा विमान एकपछि अर्को गर्दै आकस्मिक अवतरण (इमर्जेन्सी ल्यान्डिङ)का घटना भएका छन्।
बुधबार मात्र बजेट एयरलाइन्स ‘गो फर्स्ट’को एक विमानलाई जयपुरमा आकस्मिक अवतरण गराइएको छ। विन्डसिल्डमा चर्किएको देखिएपछि ‘एयरबस ३२० नियो’ विमानलाई आकस्मिक अवतरण गराउनु परेको हो।
उक्त विमान दिल्लीबाट गुवाहाटी जाँदै थियो। आकाशमै विन्डसिल्ड चर्किएको देखिएपछि जयपुर विमानस्थलमा अवतरण गराइएको थियो।
भारतीय ठूला विमानको आकस्मिक अवतरणको यो पहिलो घटना होइन। यसअघि गत आइतबार शारजाहबाट हैदरावाद आउँदै गरेको इन्डिगो एयरको विमानलाई पाकिस्तानको कराँचीमा आकस्मिक अवतरण गराइएको थियो। उक्त विमान पनि एयरबसकै ‘ए-३२० नियो’ सिरिजको थियो।
सोही दिन एयर इन्डिया एक्सप्रेसको विमान ओमानको मस्कटमा आकस्मिक अवतरण गराइएको थियो। उक्त विमान कालीकटबाट दुबई जाँदै थियो। विमानमा केही जलेको गन्ध आएपछि आकस्मिक अवतरण गराउनु परेको थियो। यो विमान बोइङको ‘बी ७३७-८००’ सिरिजको थियो।
यस्तै, ५ जुलाईमा स्पाइसजेटको अर्को विमानलाई पाकिस्तानकै कराँचीमा इमर्जेन्सी ल्यान्डिङ गराइएको थियो। दिल्लीबाट दुबई जाँदै गरेको बोइङ ७३७ विमानको फ्युल इन्डिकेटरमा समस्या थियो। सोही दिन इन्डिगोको ‘एयरबस ३२० नियो’ सिरिजको विमानलाई इन्दौरमा आकस्मिक अवतरण गराइयो। उक्त विमानको क्याबिनमा धुवाँ निस्केको थियो।