कोलम्बो- श्रीलंकामा गोटाबाया राजापाक्षेको राजीनामापछि बुधबार नयाँ राष्ट्रपतिका लागि चुनाव हुँदैछ।
श्रीलंकाका सांसदहरूले नयाँ राष्ट्रपतिका लागि मतदान गर्दै छन्। राष्ट्रपतिका लागि त्रिपक्षीय भिडन्त हुँदैछ। कार्यवाहक राष्ट्रपति रनिल बिक्रमासिंघे, दलस अलापेरुमा र वामपन्थी नेसनल पिपल्स पावर पार्टीका अनुरा कुमारा दिसानायके मैदानमा छन्।
सत्तारुढ दल एसएलपीपीले प्रधानमन्त्री रनिल बिक्रमासिंघलेलाई राष्ट्रपति उम्मेदवार बनाएको छ। यस दौडमा उनी सबैभन्दा अगाडि देखिन्छन्। तर, प्रदर्शनकारीले राष्ट्रपति राजापाक्षेसहित प्रधानमन्त्री बिक्रमासिंघको पनि राजीनामा मागेका थिए।
बिक्रमासिंघेलाई सत्तारुढ दलकै असन्तुष्ट सांसद दलस अलापेरुमाले कडा टक्कर दिने अनुमान छ। उनलाई विपक्षले पनि समर्थन दिएका छन्।
बुधबार निर्वाचित हुने नयाँ राष्ट्रपतिको कार्यकाल नोभेम्बर २०२४ सम्म हुनेछ। अर्थात्, नयाँ राष्ट्रपतिले गोटाबाया राजापाक्षेको बाँकी कार्यकाल मात्र पूरा गर्नेछन्।
नयाँ राष्ट्रपतिका लागि २२५ जना सांसदले मतदान गर्ने छन्। तीनजनामध्ये एकलाई राष्ट्रपति निर्वाचित हुन आधाभन्दा बढी सांसदको मत आवश्यक हुनेछ।