नयाँदिल्ली- सन् २०२१ मा भारतका एक लाख ६३ हजार ३७० जनाले भारतको नागरिकता त्यागेको त्यहाँको गृह मन्त्रालयले जनाएको छ।
सन् २०२० मा यो संख्या ८५ हजार २५६ थियो। यस्तै, सन् २०१९ मा एक लाख ४४ हजार १७ जनाले भारतको नागरिकता त्यागेका थिए।
केन्द्रीय गृह राज्यमन्त्री नित्यानन्द रायले मंगलबार संसदमा यसबारे जानकारी दिएका हुन्। बहुजन समाज पार्टीका लोकसभा सांसद हाजी फजलुर रहमानले उठाएको प्रश्नमा राज्यमन्त्री रायले उक्त जानकारी दिएका हुन्।
सांसद रहमानले भारतको नागरिकता त्याग्ने लहर चल्नुको कारण सरकारसँग मागेका थिए। उनको प्रश्नको जवाफमा राज्यमन्त्री रायले भारतीय नागरिकले सबैभन्दा बढी अमेरिका गएर बस्न रुचाएको जानकारी सदनमा दिएका छन्।
उनका अनुसार सन् २०२० मा ३० हजार ८२८ भारतीयले अमेरिकाको नागरिकता लिएको पाइएको छ। सन् २०२१ मा यो संख्या ७८ हजार २८४ पुगेको छ।
अमेरिकापछि भारतीय नागरिकले अस्ट्रेलिया गएर बस्न रुचाएको पाइएको छ। सन् २०२१ मा २३ हजार ५३३ भारतीयले अस्ट्रेलियाको नागरिकता पाएका छन्। सन् २०२० मा यो संख्या १३ हजार ५१८ थियो।
यस्तै, क्यानाडामा भारतीय नागरिकको बसाइँ सराइ ज्यादा देखिएको छ। सन् २०२१ मा २१ हजार ५९७ जना भारतीयले क्यानाडाको नागरिकता प्राप्त गरेका छन्। चौथो नम्बरमा ब्रिटेन भारतीयहरूको आकर्षणको केन्द्र बनेको छ। सन् २०२० मा ६ हजार ४८९ भारतीयले ब्रिटेनको नागरिकता पाएकामा सन् २०२१ मा बढेर १४ हजार ६३७ जना त्यहाँ पुगेका छन्।
त्यसपछि इटालीमा सन् २०२० मा २३ सय १२ र २०२१ मा ५९ सय ८६, न्युजिल्यान्डमा २०२० मा २१ सय १६ र २०२१ मा २६ सय ४३, सिंगापुरमा २०२० मा २२ सय ८९ र २०२१ मा २५ सय १६, जर्मनीमा २०२० मा २१ सय ५२ र २०२१ मा २३ सय ८१, द नेदरल्यान्ड्समा २०२० मा १२ सय १३ र २०२१ मा २१ सय ८७ तथा स्विडेनमा २०२० मा एक हजार ४६ र २०२१ मा १८ सय ४१ जना भारतीयले नागरिकता प्राप्त गरेका छन्।