काठमाडौँ । तत्कालीन प्रधानमन्त्री केपी शर्मा अोली नेतृत्वको सरकारले ‘आर्थिक सहायाता’को नाममा मनपरी ढुकुटीको पैसा बाँडेको पाइएको छ । यो रकम गृह मन्त्रालयमार्फत राजनीतिक दलका पहुँचवाला नेता तथा कार्यकर्तालाई बाँडेको पाइएको हो ।
तत्कालीन प्रधानमन्त्री ओलीले आर्थिक सहयताका नाममा तीन वर्षमा ३० करोड रुपैयाँभन्दा बढी रकम बाँडेका हुन् । सरकारी निकायले तयार पारेको प्रतिवेदनअनुसार ओली नेतृत्वको सरकारले उक्त रकम आर्थिक सहायता शीर्षकमा बाँडेको देखाएको हो ।
महालेखा परीक्षकको कार्यालयले हालै सार्वजनिक गरेको आफ्नो ५९ औँ वार्षिक प्रतिवेदनमा आर्थिक वर्ष २०७५-७६ देखि २०७७-७८ सम्मको तीन वर्षमा आर्थिक सहायता शीर्षकमा कूल ३० करोड १० लाख २९ हजार रुपैयाँ वितरण गरेको उल्लेख गरिएको छ । उक्त समयमा सरकारको नेतृत्व ओलीले गरेका थिए ।
प्रतिवेदनअनुसार आर्थिक वर्ष २०७५-७६ मा १३ करोड ४ लाख ९५ हजार रपैयाँ, २०७६-७७ मा ९ करोड ११ लाख ६७ हजार रुपैयाँ र २०७७-७८ मा ७ करोड ९३ लाख ६७ हजार रुपैयाँ आर्थिक सहायताको नाममा वितरण भएको छ ।
नागरिक राहत, क्षतिपूर्ति तथा आर्थिक सहायतासम्बन्धी कार्यविधि, २०६८ को बुँदा १२ अनुसार राष्ट्रिय जीवनका महत्वपूर्ण व्यक्तिलाई औषधोपचार तथा आर्थिक सहायता तोकिएको दरमा उपलब्ध गराउने उल्लेख छ ।
‘कार्यविधिको बुँदा १२.१ (ग) बमोजिम बढीमा ७ लाखसम्म आर्थिक सहायता दिन सकिनेमा यो वर्ष (२०७७-७८) एक जनालाई ८ लाख १२ हजार रुपैयाँ, ११ जनालाई प्रतिव्यक्ति १० लाख रुपैयाँ, ७ जनालाई १२ लाख ५० हजार रुपैयाँदेखि २५ लाख ३० हजार रुपैयाँसम्मका दरले तथा एक सेवा आश्रमलाई एक करोड र एक साँस्कृतिक विकास कोषलाई २० लाख आर्थिक सहायता भुक्तानी गरेको छ,’ प्रतिवेदनमा उल्लेख छ ।
यस्तो आर्थिक सहायताको उद्देश्य गरिब आफ्नो उपचार आफै गर्न नसक्नेलाई उपचार खर्च उपलब्ध गराउने भए पनि पाउने अधिकांश व्यत्तिहरु दलका पहुँचवाल नेता तथा कार्यकर्ता हुने गरेका छन् । सरकारले ऐन र कार्यविधि मिचेर यस्तो आर्थिक सहायता उपलब्ध गराउँदै आएको छ जसलाई महालेखाले प्रतिवेदनमा औँल्याएको छ ।
‘जनस्वास्थ्य ऐन, २०७५ को दफा ३० मा विदेशमा उपचार गर्नु पर्ने भएमा सोको लागि लाग्ने खर्च नेपाल सरकारबाट उपलब्ध नगराइने व्यवस्था भए तापनि सो प्रयोजनका लागि आर्थिक सहायता प्रदान गरेको देखिन्छ, कार्यविधिको सीमाभित्र रही मापदण्डभन्दा बढी आर्थिक सहायता वितरण गर्ने कार्य नियन्त्रण गर्नु पर्दछ,’ महालेखाले भनेको छ ।