नयाँदिल्ली- भाजपाकी पूर्वराष्ट्रिय प्रवक्ता नूपुर शर्मा पक्राउ पर्नबाट बच्न सर्वोच्च अदालत पुगेकी छन्। उनीविरुद्ध प्रहरीमा उजुरी दर्ता भएको छ।
सर्वोच्चमा दायर गरेको रिटमा उनले केही अराजक तत्त्वले आफूलाई हत्या र बलात्कार गर्ने धम्की दिएको उल्लेख गरेकी छन्। आफूविरुद्ध पहिलो उजुरी दिल्लीमा दर्ता भएकाले अन्य सबै उजुरीलाई त्यसैसँग जोड्न उनले रिटमा माग गरेकी छन्।
गत महिना एक टेलिभिजन बहसमा उनले पैगम्बर मोहम्मदबारे विवादित टिप्पणी गरेकी थिइन्। उनको टिप्पणीमाथि भारतमा मात्र नभई विश्वभरबाट विरोध भएको थियो। त्यसपछि भारतका धेरै राज्यमा उनीविरुद्ध उजुरी दर्ता भएको छ।
मुसलमान समुदायको बाहुल्य रहेका अधिकांश मुलुकले उनको टिप्पणीप्रति भारत सरकारसँग विरोध जनाएका थिए। यसअघि भारतको सर्वोच्च अदालतले उनीसँग त्यस्तो टिप्पणी गर्न किन आवश्यक थियो भनी प्रश्न गरेको थियो। यस्तै, त्यस्तो टेलिभिजन बहसको उद्देश्य के हो भनी प्रश्न गरेको थियो।
र, अदालतले शर्मालाई भनेको थियो, ‘तपाईं कुनै पार्टीको प्रवक्ता हुनुको अर्थ जथाभावी बोल्ने लाइसेन्स प्राप्त व्यक्ति हुनु होइन।’ मंगलबार उनको नयाँ रिटमाथि सुनुवाइ तय भएको छ।