काठमाडौँ । बुधबार दिउँसो उडिरहेको जहाजभित्र चुरोट तान्ने यात्रुले नसाका कारण घटना हुन पुगेको बताएका छन् । प्रहरी नियन्त्रणमा रहेका यात्रु २९ वर्षीय नारायण उपाध्यायले पहिलोपटक जहाजमा चढेकाले चुरोट तान्न नमिल्ने कुराबारे जानकार नभएको बताए ।
उनलाई अहिले जिल्ला प्रहरी कार्यालय कैलालीको नियन्त्रणमा राखिएको छ । आफू पहिलोपटक जहाज चढेको बताउँदै उनले भने, ‘काठमाडौं विमानस्थलमा चेकिङ्ग हुँदा सुरक्षाकर्मीले मेरो साथबाट चुरोट र लाइटर भेटाएका थिए, उहाँहरुले फाल्न भनेको तर मैले नफाली लुकाएँ, जहाज उडेपछि शौचालय छिर्दा चुरोटको तलतल लागेकाले तानेँ ।’
यस्तै, उनले आफू मदिराको नशामा झ्याप भएकाले गल्ती हुन पुगेको बताएका छन् । उडान नं २५३ बाट धनगढी उडेको जहाजको सीट नं ‘११ ए’ मा बसेका उनले जहाजभित्रै चुरोट तानेका थिए ।
उडिरहेको जहाजमा धुँवा देखेपछि यात्रु आगलागी भएको ठानेर आत्तिएका थिए । जहान धनगढीमा ल्यान्ड हुनासाथ उनलाई प्रहरीले नियन्त्रणमा लिएको थियो ।