काठमाडौँ । नेकपा एकीकृत समावादीका अध्यक्ष माधव नेपालले नेकपा एमालेले आफूहरूसँग सहकार्य नगर्ने भएको बताएका छन् ।

समाजवादी प्रेस संगठनले बुटवलमा आयोजना गरेको भेटघाटमा अध्यक्ष नेपालले एमालेले बन्द गरेको सहकार्यको ढोका अझै नखुलेको बताए । पत्रकारले आगामी चुनावमा एमालेसँग तालमेलको सम्भावना कत्तिको छ भनेर सोधेको प्रश्नमा उनले भने, ‘हामीले गरेको विद्रोहको औचित्य पुष्टि भएको छ, हामीले उठाएका इस्युहरू ज्युँदै छन् ।’

अध्यक्ष नेपालले आगामी चुनावमा पाँच दलीय गठबन्धन कायमै रहने बताउँदै पार्टी गठबन्धनमा मात्रै भर नहुने बताए । सोही क्रममा उनले २०६३ सालमा गिरिजाप्रसाद कोइरालालाई प्रधानमन्त्री बनाएको र २०६६ मा उनले आफूलाई प्रधानमन्त्री बनाएको दाबी गरे ।