झापा- नक्कली डलर बोकेको अभियोगमा पक्राउ परेका भारतीय फोटो पत्रकार दुर्लभ रोय चौधरीलाई झापा जिल्ला अदालतले एक वर्ष कैद र १५ हजार रुपैयाँ जरिवाना तोकेको छ।
जिल्ला अदालतका न्यायाधीश गिरिराज गौतमको इजलासले उनलाई कैद र जरिवाना तोकेको हो। उनी गत मंसिरदेखि झापा कारागारमा बन्दी जीवन बिताइरहेका छन्।
नेसनल जोग्राफी, वाल स्ट्रिट फोटोबुक, टाइम्स अफ इन्डियालगायत सञ्चार माध्यममा कार्यरत चौधरी २ मंसिर ०७८ मा भद्रपुर विमानस्थलबाट नक्कली अमेरिकी डलरसहित पक्राउ परेका थिए। नेपालमा डकुमेन्ट्री बनाउने प्रयोजनका लागि उनले भारतबाटै अमेरिकी डलरको फोटोकपी बोकेर आएका थिए। उनी आफैंले प्रहरीलाई उक्त डलरको फोटोकपी देखाएका थिए। र, डकुमेन्ट्री बनाउँदा प्रयोग गर्ने बताएका थिए। तर, प्रहरीले उनलाई पक्राउ गरी मुद्दा चलाएको थियो।
इन्टरनेटबाट डाउनलोड गरिएको एकै नम्बरको डलरको फोटोकपीका लागि अनुमति नलिई ल्याएको उल्लेख गर्दै उनलाई अदालतले पुर्पक्षका लागि थुनामा पठाएको थियो।