काठमाडौं– पर्साको बहुदरमाई नगरपालिकामा प्रहरीले जलाउँदै गरेको अवस्थामा १४ वर्षीया किशोरीको शव नियन्त्रणमा लिएको छ।

प्रहरीले बहुदरमाई नगरपालिका–७ छपकैया टोलबाट आधा जलेको किशोरीको शव प्रहरीले नियन्त्रणमा लिएको हो।

बुधबार राति ११ बजे किशोरीका आफन्तले घाटमा शंकास्पद अवस्थामा लगेर जलाइरहेको अवस्थामा प्रहरीलाई खबर पुगेको थियो। किशोरीको मृत्यु शंकास्पद भएकोले तत्कालै घटनास्थलमा पुगेको प्रहरीले आधा जलेको किशोरीको शव नियन्त्रणमा लिएको पर्सा प्रहरी कार्यलयले जनाएको छ ।

प्रहरीका अनुसार प्रहरी पुगेपछि शव जलाइरहेको किशोरीका आफन्तहरु भागेका थिए। किशोरीको मृत्यु शंकास्पद देखिएकोले अनुसन्धानको लागि उनकी आमा, दिदी र ठूलीआमालाई सोधपुछका लागि नियन्त्रणमा लिइएको छ ।

शव पोष्टमार्टमका लागि नारायणी अस्पतालमा पठाइएको तथा पक्राउ परेकाहरुसित सोधपुछ गरी घटनाको बारेमा थप अनुसन्धान भइरहेको प्रहरीले जनाएको छ ।