काठमाडौँ । निवर्तमान मन्त्री तथा नेकपा एकीकृत समाजवादीकी सचिव रामकुमारी झाँक्रीले आफूले शहरी विकास मन्त्री हुँदा नीतिगत रुपमा ठूलो प्रस्थानविन्दू (डिपार्चर) काम गरेको दाबी गरेकी छन् ।
आफ्नो सामाजिक सञ्जाल फेसबुकमार्फत उनले आफूले मन्त्री हुँदा गरेको कामको परिणाम भविष्यमा पनि देखिने बताइन् । ‘यो बीचमा कार्यपालिका मात्र होइन, न्यायपालिका, व्यवस्थापिका जस्ता राज्यका अंगहरूका प्रमुखज्यूहरूसँग सार्वजनिक सरोकारका विषयमा पटक पटक परामर्श गरेर इमानका साथ सोझो मनले, जनताको भलो चिताएर आफ्नो शतप्रतिशत कर्म लगाएर मन्त्रालयबाट बिदा भएकी छु, त्यसका परिणामहरू आइरहेका छन्, आइरहने छन्, मैले नीतिगत क्षेत्रमा गरेको रूपान्तरण ठूलो डिपार्चर हो भन्नेमा दुई मत छैन,’ उनले भनेकी छन् ।
करिब ८ महिनापछि आइतबार शहरी विकास मन्त्रालयबाट बिदा लिएसँगै झाँक्रीले नवनियुक्त मन्त्री मेटमणि चौधरीलाई बधाई दिँदै आफूले गरेको कामलाई निरन्तरता दिने विश्वास लिएकी छन् ।
‘नवनियुक्त मन्त्री जीले मैले नीतिगत रुपमा अगाडि बढाएका विषयलाई निरन्तरता दिनु नै हुनेछ भन्नेमा ढुक्क छु, साथै माननीयन मन्त्री मेटमणि चौधरीलाई हार्दिक बधाई तथा सफल कार्यकालको शुभकामना,’ उनले भनेकी छन् ।
