बेइजिङ– चीनको व्यापारिक केन्द्र सांघाईमा कोरोना भाइरसको ओमिक्रोन भेरियन्टमाथि जित हासिल भएको अधिकारीहरूले घोषणा गरेका छन्।

चिनियाँ कम्युनिस्ट पार्टी (सीपीसी)को सांघाई कमिटीले ओमिक्रोन संक्रमणविरुद्धको लडाईंमा जित हासिल भएको घोषणा गरेको हो।

सांघाईमा पार्टी प्रमुख ली चियाङले ओमिक्रोन संक्रमण नियन्त्रणका लागि सरकार, अधिकारीहरू र स्थानीय बासिन्दाको साथका लागि धन्यवाद दिएका छन्। समुदाय स्तरमा ‘जिरो कोभिड’ पोलिसी सफल भएको उनले बताएका छन्। ‘हामीले सांघाईलाई बचाउने युद्ध जितेका छौँ,’ उनले भनेका छन्।

सन् २०२० यता सांघाईले कोभिड-१९ विरुद्धको लडाईंमा निरन्तर सफलत हासिल गरेको उनको भनाइ छ। देशभरको ६२ प्रतिशत आन्तरिक उडान, ५३ प्रतिशत आन्तरिक हवाई यात्री र ४६ प्रतिशत आयात सांघाईमा आधारित छन्। सोही कारण यो शहरलाई बेइजिङको गेट पनि भन्ने गरिएको छ।

गत मार्चदेखि पुनः देखिएको ओमिक्रोन संक्रमणका कारण सांघाईमा स्वास्थ्य मापदण्ड पालनामा कडाइ गरिएको थियो। २८ मार्चदेखि पूर्ण लकडाउन गरिएको थियो। पछिल्लो लहरमा ६ लाखभन्दा बढी बिरामी भेटिएका थिए। दुई महिनाको अथक प्रयासपछि ओमिक्रोनविरुद्धको लडाईंमा जित हासिल भएको अधिकारीहरूले घोषणा गरेका छन्।