वासिङ्टन- चीनको स्वायत्त क्षेत्र तिब्बतमाथि अमेरिकाको तिखो नजर नयाँ विषय होइन। पछिल्ला वर्षमा केही कम देखिएको यस्तो नजरले फेरि पुरानै लय समात्न थालेको छ।
अमेरिकी संसदकी सभामुख न्यान्सी पेलोसीले स्थानीय समयअनुसार बुधबार त्यसैको संकेत गरिन्। तिब्बतमा चीनले निरन्तर मानव अधिकारको उल्लंघन गरिरहेको उनको दाबी थियो। र, तिब्बतमा जारी अत्याचारविरुद्ध बोल्न विश्वभरका नेताहरूलाई आग्रह गरिन्।
चीनले तिब्बतको स्वायत्तता र पहिचानका लागि कुनै सम्मान नदेखाएको पेलोसीको आरोप थियो। वर्ल्ड पार्लिमेन्टेरियन कन्भेन्सनको आठौं सम्मेलनलाई सम्बोधन गर्दै पेलोसीले तिब्बतका बासिन्दाका लागि अमेरिकाको प्रतीज्ञा कायमै रहेको बताइन्। ‘तिब्बतको वास्तविक स्वायत्तताका लागि संसारका नेताहरू एक ठाउँमा उभिनुपर्छ,’ उनले भनिन्, ‘बेइजिङको अत्याचारविरुद्ध बोल्नु र तिब्बतका बासिन्दाको पक्षमा उभिनु जरुरी छ।’
व्यापारिक स्वार्थमा अल्झेर चीनमा भइरहेको मानव अधिकारको उल्लंघनविरुद्ध चुपचाप बस्दा भविष्यमा मानव अधिकार उल्लंघनविरुद्ध बोल्ने सबै आधार समाप्त हुने उनले बताइन्। वर्ल्ड पार्लियामेन्टेरियन कन्भेन्सनको आठौं सम्मेलन २२-२३ जुनमा वासिङ्टनमा आयोजना गरिएको छ।