मुम्बई- भारत महाराष्ट्रमा राजनीतिक संकट गहिरिएको छ। मुख्यमन्त्री उद्धव ठाकरेको पद संकटमा परेको छ।

ठाकरेका लागि संकट कति गहिरिएको छ भने उनकै कट्टर समर्थक मानिएका चारजना विधायक मुम्बई छाडेर २७ सय ३२ किलोमिटर टाढा आसामको राजधानी गुवाहाटी पुगेका छन्।

गुलाबराव पाटिल, योगेश कदम, चन्द्रकान्त पाटिल र मञ्जुला गावित गरी चार विधायक गुवाहाटीको रेडिसन ब्लू होटेलमा पुगेर बसेका छन्। पछिल्लो विद्रोहपछि मुख्यमन्त्री ठाकरेले बुधबार राति सरकारी आवास ‘वर्षा’ छाडेका छन्। उनी निजी आवास ‘मातोश्री’ पुगेका छन्।

ठाकरेको पार्टी शिवसेनाका विधायक एकनाथ सिन्धेको विद्रोहपछि महाराष्ट्रमा राजनीतिक संकट गहिरिएको हो। सिन्धे आफ्ना समर्थक विधायकहरू लिएर गुवाहाटी पुगेका छन्। आफूलाई स्वतन्त्रसहित ४६ विधायकको समर्थन रहेको सिन्धेले दाबी गरेका छन्। बुधबार मुख्यमन्त्री ठाकरेले राज्यवासीका नाममा सम्बोधन गर्दै आफू राजीनामा दिन तयार भएको तर त्यसका लागि पार्टीका विधायकहरू आएर राजीनामा दिन भन्नुपर्ने बताएका थिए।