काठमाडौं- राष्ट्रिय परीक्षा बोर्डले यस वर्षको माध्यमिक शिक्षा परीक्षा (एसईई)को नतिजा असार मसान्तभित्र सार्वजनिक गर्ने तयारी गरेको छ। यसका लागि बोर्डले तीव्रताका साथ काम गरिरहेको छ।
प्राविधिक समस्या नआए ३२ असारभित्र नतिजा सार्वजनिक गरिने बोर्डका अध्यक्ष डा. महाश्रम शर्माले बताए।
बोर्डको एसईई (कक्षा १०)का परीक्षा नियन्त्रक अर्जुन रायमाझीका अनुसार अहिले उत्तरपुस्तिका परीक्षणको काम सम्पन्न गरी संपरीक्षणको कामसमेत अन्तिम चरणमा पुगेको छ। कम्प्युटर इन्ट्री, रुजु गर्नेलगायत काम भइरहेको उनले बताए।
२० असारमा प्राप्तांक इन्ट्री, २१ र २२ मा मिस म्याच र २३ देखि २९ सम्म टेबुलेसन तथा ३२ असारमा नतिजा सार्वजनिक गर्ने कार्ययोजना कार्यालयको छ।
यसअघि चार महिनामा सार्वजनिक हुँदै आएको परीक्षाफल यस वर्ष करिब दुई महिनामै सार्वजनिक गर्ने गरी काम भइरहेको परीक्षा नियन्त्रक रायमाझीले जानकारी दिए। कोरोनाका कारण दुई वर्ष आन्तरिक मूल्यांकनबाट नतिजा सार्वजनिक भए पनि दुई वर्षपछि बोर्डले विद्यार्थीको भौतिक उपस्थितिमै ९–२० वैशाखमा परीक्षा सञ्चालन गरेको थियो।
दुई हजार सात परीक्षा केन्द्रबाट ११ हजार ६१५ विद्यालयका दुई लाख ५७ हजार ९२४ छात्रा र दुई लाख ५७ हजार ५३ छात्र गरी पाँच लाख १४ हजार ९७७ विद्यार्थी यस वर्षको परीक्षामा सहभागी भएका थिए।
राससबाट