काठमाडौं- शुक्रबार रातिको भारी वर्षाका कारण देशका प्रमुख नदीहरूमा पानीको सतह बढेको छ।
जल तथा मौसम विज्ञान विभागको बाढी पूर्वानुमान महाशाखाका अनुसार सप्तकोशीका सहायक नदीहरू सुनकोशी र तमोरमा उल्लेख्य मात्रामा बाढी आएको छ। यस्तै, वागमती र पूर्वी राप्ती नदीमा पनि बाढीको प्रभाव देखिएको छ।
सप्तकोशी र उसका सहायक नदी किनारमा पर्ने बस्तीहरू चतरा, त्रिवेणी, रबुवाबजारलगायतका बासिन्दालाई महाशाखाले सचेत रहन आग्रह गरेको छ।
झापाको कन्काई र उसका सहायक नदीमा पनि आकस्मिक बहाव (फ्ल्यास फ्लड) बढेको छ। कन्काई किनारमा अवस्थित झापाका बस्तीहरूमा सतर्कता अपनाउन महाशाखाले आग्रह गरेको छ।
सप्तकोशीका सहायक नदीहरू, वागमती र पूर्वी राप्तीमा जल सतह खतराको तहभन्दा तलै रहने महाशाखाको पूर्वानुमान छ। तर, कन्काई र उसका सहायक नदीमा जल सतह खतराको विन्दु आसपास पुग्न सक्ने भएकाले सतर्कता अपनाउन महाशाखाले अपील गरेको छ।
महाशाखाका अनुसार शनिबार संखुवासभा, पाँचथर, इलाम, झापा, मोरङ, सुनसरी, उदयपुर, सप्तरी, सिरहा, धनुषा, महोत्तरी, सर्लाही, रौतहट, सिन्धुली, मकवानपुर, चितवन, गोरखा र लमजुङमा आकस्मिक बाढी (फ्ल्यास फ्लड)को सम्भावना छ।
यस्तो छ पूर्वानुमान
