भारत सरकारले ल्याएको ‘अग्निपथ’ स्किमविरुद्ध शुरु भएको प्रदर्शनले देशभर अशान्ति निम्त्याएको छ। प्रदर्शनहरूका कारण तीन सयभन्दा बढी रेल सेवा ठप्प भएका छन्।

तीन दिनयता भइरहेको विरोध प्रदर्शनका क्रममा प्रदर्शनकारीहरूले रेल सेवालाई निशाना बनाएका छन्। र, विभिन्न स्टेसन र रेलमा आगजनी र तोडफोड गरेका छन्।

तलंगना, बिहार, उत्तरप्रदेशलगायत राज्यमा रेलहरूमा आगजनी गरिएको छ। ‘पूर्व मध्य रेलवे’ले शुक्रबार साँझ विज्ञप्ति जारी गर्दै २१४ वटा रेल रद्द गरिएको जनाएको छ। रेल सेवामा प्रदर्शनकारीले लुटपाट मच्चाएका छन्।

शुक्रबार तलंगनामा एकजनाको मृत्यु भएको छ। रेल मन्त्री अश्विनी वैष्णवले रेल राष्ट्रिय सम्पत्ति भएकाले तोडफोड र आगजनी नगर्न प्रदर्शनकारीहरूलाई अपील गरेका छन्।

भारत सरकारले ९० दिनभित्र करिब ४० हजार युवालाई सेनामा भर्ति गराउने योजना ल्याएको छ, जसको नाम ‘अग्निपथ’ दिइएको छ। छनोट भएका युवालाई ६ महिने तालिम दिने सरकारी योजना छ। छनोट हुने युवाको उमेर साढे १९ देखि २१ वर्ष हुनुपर्ने नियम ल्याइएको छ।

कक्षा १० या १२ उत्तीर्ण गरेका युवालाई चार वर्ष सेनामा सेवा गर्न लगाइने बताइएको छ। पहिलो वर्ष ३० हजार र चौथो वर्ष ४० हजार मासिक पारिश्रमिक दिइने उल्लेख छ। छनोट भएकामध्ये २५ प्रतिशत युवालाई नियमित सेना बनाउने सरकारी योजना छ।

चार वर्षे नोकरीबाट युवाको भविष्य सुरक्षित नहुने भएकाले बरु दुई वर्षदेखि रोकिएको भर्ति खुला गर्नुपर्ने प्रदर्शनकारीहरूको माग छ। र, ‘अग्निपथ स्किम’ युवाको भविष्यका लागि खेलबाड भएको र राष्ट्रिय सुरक्षाका लागि पनि खतरनाक योजना भएको उनीहरूको माग छ।