काठमाडौँ । नेकपा एकीकृत समाजवादीका अध्यक्ष माधव कुमार नेपालले प्रधानमन्त्री शेरबहादुर देउवालाई सुझाव दिएका छन् । उनले अमेरिका भ्रमणमा कुनै पनि कागजपत्रमा हस्ताक्षर गर्दा ख्याल गर्न प्रधानमन्त्रीलाई सुझाव दिएका हुन् ।
अमेरिकाको स्टेट पार्टनरसिप प्रोग्राम (एसपीपी)को सन्दर्भ उठिरहेको बेला अध्यक्ष नेपालले कहिले काहिँ थाहै नपाएर हस्ताक्षर गर्न सकिने हुँदा ख्याल गर्न प्रधानमन्त्री देउवालाई सुझाव दिए ।
शुक्रबारको अन्तर्राष्ट्रिय सम्बन्ध समितिको बैठकमा सहभागी उनले कूटनीतिमा दबाब मात्र नभई फसाउने काम हुने भन्दै ती कुराको ख्याल गर्नु पर्ने बताए । ‘कूटनीतिका धेरै पक्षहरू हुन्छन्, कहिले दबाब दिएर, कहिले फकाएर, थाहै नदिइकन, निदाएको बेलामा, ह्वीस्की खुवाएर, यो सबै हुने भएकाले ह्वीस्की खाएर नशाको बेलामा सही गरिएला ख्याल गर्नुहोला,’ पूर्वप्रधानमन्त्री समेत रहेका नेपालले भने ।
उनले एसपीपीको बारेमा सुरुदेखि अहिलेसम्म के-के भयो भनेर सरकारले यथार्थ बताउनु पर्ने बताए ।