काठमाडौँ । लुम्बिनी प्रदेशकी स्वास्थ्य राज्यमन्त्री विमला वलीलाई प्रहरीले नियन्त्रणमा लिएको छ । आफ्ना ‘प्रेमी’ एकराज बस्नेतकी श्रीमती र छोरीलाई कुटपिट गरेपछि स्थानीयबासीको सहयोगमा उनलाई प्रहरीले नियन्त्रणमा लिएको हो ।
गत वर्ष भदौमा विमलाले आफ्नो फेसबुक स्टोरीमा एकराजलाई चुम्बन गरेको फोटो हालेकी थिइन् । उक्त फोटोको बारेमा उनले एकराज आफ्नो भाइ भएको बताउँदै फोटो इडिट गरेर बनाएको बताएकी थिइन् ।
तर, मंगलबार बिहानै मन्त्री विमलाले एकराजलाई आफ्नो पोइ खोेई ? भन्दै घरमै गएर तमसा देखाएकी हुन् । एकराजकी श्रीमती मीना भण्डारीका अनुसार विमलाले कुटपिट गरी कपडा च्यातिदिएर कोठामा गएर बसेकी थिइन् ।
एकराजकी पत्नी मीनाका अनुसार विमलाले उनको घरमा आएर एकराजलाई आफ्नो श्रीमान दाबी गरेकी थिइन् ।
मंगलबार बिहानै एकराजको घरमा पुगेकी विमलाले स्कुल जान तयार भएकी छोरीलाई समेत कुटेकी थिइन् । ‘बिहानै आएर गेटमा बेस्सरी हल्लाइ, मैले ढोका खोलेँ, भित्र आउनासाथ ‘मेरो एकराज खोइ ?’ भन्दै पर्दाहरु तानिन्, मैले किन्देको लुगा भनेर सबै लुगा मिल्काइदिइन्, अनि मलाई गालामा हानी,’ मीनाले भनिन्, ‘उसले एकराज मेरो पोइ हो भनिरहेकी थिइन् ।’
घटनापछि मीनाले जेठाजुलाई खबर गरेकी थिइन् । जेठाजुले प्रहरी बोलाएर इलाका प्रहरी कार्यालय तुल्सीपुरको प्रहरी टोली पुगेको थियो । प्रहरीले विमलालाई एकराजको कोठाबाट नियन्त्रणमा लिएको थियो । घटना हुँदा एकराज घरमा थिएनन् ।
एकराज र मीनाका दुई जना बच्चा रहेका छन् । विमलाका पनि दुई छोरा छन् । उनको श्रीमान गत वर्ष मात्रै दुर्घटना परी निधन भएका थिए ।