काठमाडौं- एमाले सांसद भीम रावलले काठमाडौंमा फोहोर संकटकालको अवस्था देखिएको बताएका छन्।
प्रतिनिधिसभाको बिहीबारको बैठकमा विनियोजन विधेयक, २०७९ अन्तर्गत विविध शीर्षकमाथिको छलफलमा भाग लिँदै रावलले फोहोर व्यवस्थापनको विषयलाई महानगरको टाउकामा थोपरेर सरकारले दायित्वबाट पन्छिन नहुने बताए। उनले जनस्वास्थ्यमा खेलबाड नगर्न पनि अनुरोध गरे।
अर्थ मन्त्रालयसँगको शीर्षकमाथि प्रश्न गर्दै उनले संसारमा असफल भइसकेको नवउदारवाद र पुँजीकरणको बाटोमा राज्य हिँडिरहेको भन्दै आलोचना गरे।
व्यापारघाटा उच्च, चालु खातामा घाटा वृद्धि, भुक्तानी असन्तुलन तीव्र र बाह्य ऋण बढ्दो रहेको तथा हरेक नागरिकमाथि ६० हजार रुपैयाँभन्दा बढी ऋण भइसकेको अवस्थामा नेपालको अर्थतन्त्रलाई सरकारले कसरी व्यवस्थापन गर्छ भन्दै उनले जवाफ मागे।
रक्षा मन्त्रालयसँगको विषयमा प्रश्न गर्दै उनले लिपुलेक, लिम्पियाधुरा र कालापानीको विषयमा सरकार मौन बस्नुले स्वाधिनता र स्वतन्त्रताको सुरक्षा नहुने बताए।