काठमाडौँ । प्रधानमन्त्री शेरबहादुर देउवाले आफू पहिलोपटक काठमाडौँ आउँदाको परिस्थिति सम्झदै भावुक बनेका छन् । यस क्रममा उनले सुदूरपश्चिम प्रदेशले विकासमा ठूलो फड्को मारेको बताए ।
आइतबार काठमाडौंमा आयोजित सुदूरपश्चिमाञ्चल सरोकार समाजको सधारणसभामा बोल्दै प्रधानमन्त्री देउवाले अझै धेरै समस्या यथावत् रहेको स्मरण गर्दै विकासको हिसाबले फड्को मारेको बताए ।
‘म एसएलसी पास गरेर काठमाडौं छिरेको हुँ, त्यो बेला डडेलधुरादेखि धनगढीसम्म बसमा र त्यसपछि लखनउ हुँदै रेल चढेर, फेरि गाडी चढेर काठमाडौं आउनु परेको थियो,’ उनले स्मरण गरे, ‘अहिले सुदूरपश्चिम सीधै काठमाडौँसँग जोडिएको छ, अहिले त्यस्तो दुःख छैन, गाउँगाउँमा बाटो पुगेको छ ।’
यस्तै, प्रधानमन्त्री देउवाले सुदूरपश्चिममा विकासका थुप्रै सम्भावनासँगै गरिबीको समस्या हटाउनु पर्ने देखिएको बताए । उनले सुदूरपश्चिमको गरिबी र अशिक्षा हटाई समग्र सुदूरपश्चिम प्रदेशको विकासका लागि सबै क्षेत्रबाट पहल हुनु पर्ने बताए ।