काठमाडौं- पछिल्लो समय बजारमा तरकारी र फलफूलको मूल्य निरन्तर उकालो लागेको छ।
तुलनात्मक रूपमा एक महिनामा फलफूल र तरकारीको मूल्य उकालो लागेको देखिन्छ, जसले गर्दा उपभोक्ता मारमा छन्।
कालीमाटी फलफूल तथा तरकारी बजार विकास समितिको मूल्यसूचीअनुसार २५ देखि ५० रुपैयाँले मूल्यवृद्धि भइरहेको छ।
एक महिनाअघि हरियो अंगुर प्रतिकिलो औसत मूल्य १५० रुपैयाँ थियो। अहिले बढेर औसत प्रतिकिलो १९० रुपैयाँ पुगेको छ। यस्तै, अदुवाको औसत मूल्य प्रतिकिलो ५५ थियो, अहिले बढेर ७५ रुपैयाँ पुगेको छ।
एक महिनाअघि प्रतिकिलो ३२५ रुपैयाँ रहेको रहेको अनार अहिले बढेर औसत मूल्य प्रतिकिलो ३७५ पुगेको छ। यस्तै, आलुको प्रतिकिलो औसत मूल्य २७ रुपैयाँबाट बढेर किलोको ३४ रुपैयाँ पुगेको छ। स्थानीय काउलीको औसत मूल्य ५५ रहेकामा अहिले २० रुपैया बढेर ७५ रुपैयाँ पुगेको छ। लोकल काँक्रोको औसत मूल्य ४५ रहेकामा अहिले प्रतिकिलो ५५ रुपैयाँ पुगेको छ।
हाइब्रिड काँक्रो प्रतिकिलो १५ रुपैयाँबाट बढेर २५ रुपैयाँ पुगेको छ। केरा दर्जनको १३५ रहेकामा १० रुपैयाँले बढेर औसत मूल्य १४५ रुपैयाँ पुगेको छ।
आँप र कुरिलोको मूल्य घट्यो
केही तरकारीको मूल्य भने महिनादिनयता घटेको पाइएको छ। खासगरी, आँप र कुरिलोको मूल्य घटेको छ।
कलकत्ते आँप एक महिनाअघि प्रतिकिलो २२५ रुपैयाँमा पाइन्थ्यो, हाल ९० रुपैयाँले घटेर औसतमा १६५ रुपैयाँ प्रतिकिलो छ। दसहरी आँप पनि किलोमा २९० रहेको थियो भने अहिले घटेर २७५ रुपैयाँमा झरेको छ।
कुरिलोको मूल्य पनि अहिले घटेको छ। एक महिनाअघि प्रतिकिलो औसत मूल्य ४०० रुपैयाँ रहेकामा अहिले घटेर २२५ रुपैयाँमा झरेको छ।
समितिका सूचना अधिकारी विनय श्रेष्ठका अनुसार उपभोक्तामा अत्यधिक माग बढ्नु र बजारले आपूर्ति सहज गर्न नसक्दा तरकारी र फलफूलको मूल्यवृद्धि भएको हो। समयमा बेमौसमी तरकारी तथा फलफूल बजारमा उपलब्ध हुन नसक्दा मूल्यवृद्धि भएको उनले बताए।