पूर्वमन्त्री तथा लोसपा सांसद विमलप्रसाद श्रीवास्तवले वीरगञ्जमा चिनी मिल र कृषि औजार कारखाना पुनः सञ्चालनमा ल्याउन आफ्नो घर नै सरकारलाई जिम्मा लगाउने घोषणा गरेका छन्।
प्रतिनिधिसभाको बुधबारको बैठकमा आगामी आवको बजेटमाथि छलफलमा भाग लिँदै श्रीवास्तवले यसै वर्ष वीरगञ्जमा चिनी मिल र कृषि औजार कारखाना सञ्चालनमा ल्याउन सरकार तयार भए आफू घर जिम्मा लगाउन तयार भएको बताएका हुन्।
‘वीरगञ्जमा कृषि औजार कारखाना र चिनी मिल सञ्चालन हुन्छन् भने मेरो नामको एउटा घर छ, त्यो घर या त सरकारको नाममा पास गर्छु, नभए घर बेचेरै भए पनि एक वा डेढ करोडजति हुन्छ, बेचेर व्यक्तिगत रूपमा सहयोग गर्न तयार छु,’ उनले भने।
वीरगञ्जमा चिनी मिल खुलेमा बारा, पर्सा, रौतहटलगायत जिल्लाका हजारौं कृषक लाभान्वित हुने, त्यति नै रोजगारी सिर्जना हुने उनले बताए। कृषि औजार कारखानाबाट मुलुकभरका किसानलाई कृषि औजार उपलब्ध हुने भएकाले छिटो सञ्चालन गर्न उनले माग गरे।
बिस्कुट र साबुनलगायत वस्तुको आयात रोक्ने कुरामा सरकारले ध्यान दिनुपर्नेमा उनले जोड दिए। नेपाल आत्मनिर्भर रहेका वस्तुको आयात रोकेर स्वदेशी उत्पादनको प्रबर्द्धनमा जुट्न उनले आग्रह गरे।