पर्सा– मानव बेचबिखन तथा जबर्जस्ती करणीमा संलग्न रहेको अभियोगमा तीन जनालाई
आइतबार प्रहरीले पक्राउ गरेको छ।
पक्राउ पर्नेहरूमा वीरगञ्ज-८ स्थित एक रेस्टुराँमा काम गरी बस्ने मोरङ कटहरी गाउँपालिका-४ का २५ वर्षीय सुरजकुमार साह, वीरगञ्ज-१६ फुलबारी टोल डेरा गरी बस्ने जुम्ला हेमा गाउँपालिका-३ जोगीवडाका ३५ वर्षीय हरिचन्द्रनाथ योगी र वीरगञ्ज-१६ स्थित कार्की होटलकी सञ्चालक संखुवासभा खाँदबारी-१० की ४२ वर्षीया लक्ष्मी बुढाथोकी (कार्की) छन्।
सुरजकुमार साहले ५ जेठमा काठमाडौं बस्ने २५ वर्षीया युवतीलाई विवाह गर्ने प्रलोभन देखाई वीरगञ्ज बोलाई बसपार्कस्थित होटलमा लगी पटक-पटक करणी गरेको खुलेको छ। उनले ९ जेठमा कार्की होटलकी सञ्चालक बुढाथोकीको जिम्मा लगाई फरार भएका थिए।
१० जेठमा बुढाथोकीले ‘विवाह गर्छ’ भनी झुक्याई हरिचन्द्रनाथ योगीको साथमा युवतीलाई पठाएको र योगीले पीडितलाई आफ्नो कोठामा लगी मानसिक र शारीरिक यातना दिई पटक–पटक जबर्जस्ती करणी गरी बाहिर निस्कन नदिई राखेको अनुसन्धानबाट खुलेको छ।
घटनाको जानकारी प्राप्त हुनासाथ जिल्ला प्रहरी, पर्साको टोलीले उनीहरूलाई वीरगञ्जका विभिन्न ठाउँबाट पक्राउ गरेको हो। उनीहरू उपर जबर्जस्ती करणी र मानव बेचबिखन तथा ओसारपसार कसूरमा प्रहरीले अनुसन्धान अगाडि बढाएको छ।