काठमाडौं- आज २६ सेप्टेम्बर। विश्व इतिहासका विभिन्न परिघटनाले आजको दिन स्मरण गराउँछन्। प्रस्तुत छ, तीमध्ये केही प्रमुख घटनाको सारसंक्षेप।
– सन् १७८६- अमेरिकामा पहिलो सशस्त्र विद्रोह
अमेरिकामा पीडित ऋणीहरूलाई नै जेलमा हालिएको विरोधमा पहिलो सशस्त्र विद्रोह भएको थियो। म्यासाचुसेट्सको स्प्रिङफिल्डस्थित अदालत नै विद्रोहीहरूले बन्द गरिदिएका थिए। यस विद्रोहको नेतृत्व ड्यानियल सेजले गरेका थिए। रक्तपातपूर्ण संघर्षपछि सरकारले विद्रोह दमन गरेको थियो।
– सन् १९१४- अमेरिकामा फेडेरल ट्रेड कमिसन स्थापना
अमेरिकामा आजकै दिन फेडेरल ट्रेड कमिसन स्थापना भएको थियो। फेडेरल कमिसन ऐनअनुसार स्थापित यसले उपभोक्ता र बजार सुरक्षाको नियमन गर्छ।
– सन् १९५९- टाइफुनले लियो ५ हजारको ज्यान
जापानमा आएको शक्तिशाली टाइफुन ‘भेरा’ले ५ हजार जनाको ज्यान लिएको थियो। यो इतिहासमा अभिलेखीकृत शक्तिशाली टाइफुनमध्ये एक हो। त्यसका कारण वर्षा, भूस्खलनमा ठूलो जनधनको क्षति भएको थियो।
– सन् २००९- शक्तिशाली तुफानले ६ देशका ७०० को लियो ज्यान
सन् २००९ मा आजकै दिन फिलिपिन्स, चीन, भियतनाम, कम्बोडिया, लाओस र थाइल्यान्डमा आएको समुद्री तुफानले सबै देशमा गरी ७०० जनाको ज्यान लिएको थियो। उक्त तुफानलाई केत्साना नाम दिइएको थियो।
– सन् २०२०- अस्ट्रेलियामा मरे ३५० ह्वेल
अस्ट्रेलियाको तस्मानिया राज्यको म्याकक्वेरी हार्बरमा फसेका ३५० ह्वेल सामूहिक रूपमा मरेका थिए। हार्बरमा फसेकामध्ये १०८ वटा मात्र बचेका थिए। एकसाथ ठूलो संख्यामा एकै ठाउँ ह्वेल जम्मा हुँदा उक्त घटना भएको थियो।
– सन् २०२२- अमेरिकी जासुस स्नोडेनलाई रुसको नागरिकता
सन् २०२२ मा अमेरिकाका जासुसी ठेकेदार एडवार्ड स्नोडेनलाई रुसले नागरिकता दिएको थियो। रुसी राष्ट्रपति भ्लादिमिर पुटिनले नै उनलाई मस्कोमा नागरिकता प्रदान गरेका थिए।
– सन् २०२४- अर्जेन्टिनाको आधा जनसंख्या गरिब
सन् २०२४ मा प्रकाशित नयाँ आँकडाअनुसार दक्षिण अमेरिकी मुलुक अर्जेन्टिनाको आधा जनसंख्या गरिब बनेको उल्लेख थियो। ४ करोड ६० लाख जनसंख्या रहेको त्यहाँ गरिबी दर ४१.७ प्रतिशतले बढेर ५२.९ प्रतिशत जनसंख्या नै गरिब बनेको उक्त आँकडामा उल्लेख थियो। र, त्यहाँको मुद्रास्फीति दर त्यतिबेला २३० प्रतिशत थियो।
– सन् २०२४- अमेरिकामा समुद्री तुफानले लियो अढाइ सयको ज्यान
सन् २०२४ मा अमेरिकाका १० वटा राज्यमा समुद्री तुफान हेलेनले २५० जनाको ज्यान लिएको थियो। त्यसबाट सबैभन्दा बढी फ्लोरिडा राज्य प्रभावित भएको थियो।