काठमाडौं- आज ११ सेप्टेम्बर। विश्व इतिहासमा भएका असंख्य घटनाले आजको दिनलाई संसारभर स्मरण गराउँछन्। प्रस्तुत छ, केही प्रमुख घटनाको सारसंक्षेप।
– सन् २००१- विश्व इतिहासको कालो दिन
सन् २००१ मा आजकै दिन अन्तर्राष्ट्रीय आतंकवादी सञ्जाल अल-कायदाले अमेरिकाको न्युयोर्कस्थित ट्विनटावरमा विमान ठोक्काएको थियो। अमेरिकी यात्रीवाहक विमान अपहरण गरेर ट्विनटावरमा खसालिएको थियो। त्यस क्रममा ४ ठाउँमा विमान ठोक्काइएको थियो। आतंकवादीले क्यालिफोर्निया उड्न लागेका चारवटा विमानलाई अपहरण गरी न्युयोर्क र वासिङटनका महत्त्वपूर्ण भवनमा ठोक्काएका थिए। ती सबै हमलामा १९ आक्रमणकारीसहित करिब तीन हजार जनाको ज्यान गएको थियो। आक्रमणमा अर्बौं डलर क्षति भएको थियो।
– सन् २०१२- लिबियामा मारिए अमेरिकी राजदूत
सन् २०१२ मा आजकै दिन लिबियाको बंगाजीमा भएको अमेरिकी दूतावास आक्रमणमा राजदूत जे. क्रिस्टोफर स्टिभेनसहित ४ जनाको हत्या भएको थियो। इस्लामिक लडाकुहरूको करिब डेढ सयजनाको जत्थाले उक्त आक्रमण गरेको थियो। गोलीबारी, ग्रेनेड र मोर्टार प्रहार गर्दै आक्रमण गरिएको थियो।
– सन् २०१५- मक्का दुर्घटनामा १०० मारिए
सन् २०१५ मा साउदी अरेबियाको मक्कामा भएको क्रेन दुर्घटनामा १०० भन्दा बढीको ज्यान गएको थियो। विशाल क्रेन भाँचिएर वरपर रहेका मानिसलाई थिचेको थियो।
– सन् २०१८- अफगान विष्फोटमा ६८ मारिए
सन् २०१८ मा आजकै दिन अफगानिस्तानको नानगारहर प्रान्तमा भएको विष्फोटमा ६८ जनाको ज्यान गएको थियो। आत्मघाति आक्रमणकारीले उक्त विष्फोट गराएका थिए।
– सन् २०१८- तेलंगनामा बस दुर्घटना हुँदा मारिए ५३
सन् २०१८ मा आजकै दिन भारतको तेलंगना राज्यमा भएको बस दुर्घटनामा ५३ जनाको ज्यान गएको थियो।
– सन् २०१९- बाह्य अन्तरिक्षको ग्रहमा भेटियो पानी
हाम्रो सौर्य मण्डलको बाहिर एक ग्रहमा पहिलोपटक पानी फेला परेको थियो। ‘नेचर एस्ट्रोनोमी’मा प्रकाशित रिपोर्टअनुसार धर्तिबाट ११० प्रकाश वर्ष टाढाको ‘के२-१८बी’ नाम दिइएको बाह्य ग्रहमा पानी फेला परेको हो।
– सन् २०२३- लिबिया बाढीमा मारिए हजारौं
सन् २०२३ मा आजकै दिन अफ्रिकी मुलुक लिबियामा बाढीका कारण हजारौं नागरिकको ज्यान गएको थियो। ड्यानियल नाम दिइएको समुद्री तुफानका कारण भएको अविरल वर्षापछि दुईवटा बाँध भत्किएका थिए। बाँधभन्दा मुनि रहेको डेरना शहरमा बाढीले बितण्डा मच्चाएको थियो। बाढीमा परी ११ हजार ३०० जनाको ज्यान गएको थियो।