काठमाडौं- आज ३१ अगस्ट। विश्व इतिहासका असंख्य घटनाले आजको दिन संसारभर स्मरण गराउँछन्। प्रस्तुत छ, आजको दिन भएका केही विश्व चर्चित घटनाको सारसंक्षेप।
– १९५७- मलेसिया स्वतन्त्र
सन् १९९७ मा आजकै दिन हालको मलेसिया तत्कालीन मलाया महासंघले बेलायतबाट स्वतन्त्रता प्राप्त गरेको थियो। दक्षिणपूर्वी एसियाली देश मलेसिया १८औं शताब्दीको अन्त्यतिर ब्रिटिस शासनको अधीनमा पुगेको थियो। मलेसिया विश्वको सबैभन्दा ठूलो रबर उत्पादकमध्ये एक हो।
– १९९४- इस्टोनियाबाट रुसी सेना फिर्ता
इस्टोनियाले सोभियत संघबाट स्वतन्त्र भएको घोषणा गरेको ३ वर्षपछि सन् १९९४ मा आजकै दिन रुसी सेनाले इस्टोनिया छोडेको थियो। सोभियत संघले दोस्रो विश्वयुद्धको समयमा सन् १९४४ मा बाल्टिक देश कब्जा गरेको थियो। धेरै पश्चिमी देशहरूले इस्टोनिया सोभियत समाजवादी गणतन्त्रलाई कहिल्यै मान्यता दिएका थिएनन्, जुन पहिलोपटक १९४० मा स्थापित भएको थियो। १९४१ र ४४ को बीचमा नाजी जर्मनीले इस्टोनिया कब्जा गरेको थियो।
– १९९७- बेलायती राजकुमारी डायनाको कार दुर्घटनामा मृत्यु
सन् १९९७ मा आजकै दिन ब्रिटिस क्राउनको उत्तराधिकारी चार्ल्सकी पूर्व पत्नी डायनाको कार दुर्घटनामा मृत्यु भएको थियो। कारका चालकले पापाराजीबाट भाग्न खोज्दा गति बढेको कार अनियन्त्रित भएर फ्रान्सको पेरिसस्थित सडकको सुरुङमा ठोक्किएको थियो। घटनामा उनीहरू गम्भीर घाइते भए। दुर्घटनामा परी डायनाका ब्वाइ फ्रेन्ड डोडी अल फयद र कार चालकको पनि मृत्यु भएको थियो। उनको अन्त्येष्टि शताब्दीको सबैभन्दा धेरै हेरिएको टेलिभिजन घटनाहरू मध्ये एक थियो।
– १९९८- उत्तर कोरियाद्वारा आफ्नो पहिलो उपग्रह प्रक्षेपणको घोषणा
सन् १९९८ मा आजकै दिन उत्तर कोरियाले आफ्नो पहिलो उपग्रह प्रक्षेपणको घोषणा गरेको थियो। प्रजातान्त्रिक जनवादी गणतन्त्र कोरियाको सरकारी स्रोतका अनुसार क्वाङम्योङसोङ-१ नामक उपग्रहलाई पृथ्वीको तल्लो कक्षमा सफलतापूर्वक प्रक्षेपण गरिएको थियो। विश्वभरका धेरैजसो अन्तरिक्ष एजेन्सीहरूले हालसम्म पनि उक्त प्रक्षेपण सफल भए-नभएको पुष्टि गर्न सकेका छैनन्।
– २०१६- ब्राजिलकी राष्ट्रपतिलाई महाभियोग
सन् २०१६ मा आजकै दिन ब्राजिलकी राष्ट्रपति डिल्मा रुसेफलाई देशको सिनेटले महाभियोग लगाएर पदबाट हटाएको थियो। २०१४ मा पुनः निर्वाचित हुने क्रममा बजेट घाटा पूर्ति गर्न राज्य बैंकको कोष प्रयोग गरेकोमा उनी दोषी ठहरिएकी थिइन्।
– सन् २०१७- साढे १८ हजार रोहिंग्याले छाडे म्यानमार
सन् २०१७ मा म्यानमारको रोहिंग्या मुसलमान समुदायका १८ हजार ५०० जना देश छाडेर भागेका थिए। इन्टरनेसन अर्गानाइजेसन अफ माइग्रेसनका अनुसार त्यस क्रममा रखाइन प्रान्तका ११० जनाको ज्यान गएको थियो। भागेकामध्ये अधिकांश बंगलादेश पुगेका थिए।
– सन् २०१९- भारतका १९ लाख मानिस देशविहीन
सन् २०१९ मा भारतले आफ्नो भूमिमा बसोबास गरिरहेका १९ लाख मानिसलाई नागरिकताविहीन बनाएको थियो। नयाँ नागरिकता ऐन ल्याएर पूर्वोत्तर राज्य आसाममा बसोबास गर्ने उनीहरूको नागरिकता खोसिएको थियो।
– सन् २०२२- उइगुरमाथि अत्याचार गरेको आरोप
सन् २०२२ मा आजकै दिन संयुक्त राष्ट्र संघले चीनले उइगुर मुसलमान समुदायमाथि अत्याचार गरेको आरोप लगाएको थियो। पश्चिमी प्रान्त सिन्जियाङमा बसोबास गर्ने उक्त समुदायको मानव अधिकार चीन सरकारले लगातार उल्लंघन गर्दै आएको आरोप राष्ट्र संघको थियो।
– सन् २०२३- ९ लाख वर्षअघि सकिँदा सकिँदै बच्यो मानव
नयाँ कम्प्युटर मोडलको अध्ययनबाट ९ लाख वर्षअघि धर्तिबाट मानव सभ्यता लगभग समाप्त भएको पुष्टि भएको थियो। उक्त अध्ययनअनुसार त्यतिबेला धर्तिमा प्रजनन गर्ने १ हजार २८० जीव मात्र बचेको पाइएको थियो।
– सन् २०२५- सुडान पहिरोमा गयो १ हजारको ज्यान
सन् २०२५ मा आजकै दिन अफ्रिकी मुलुक सुडानमा पहिरोमा परी कम्तिमा १ हजार जनाको ज्यान गएको थियो। माराह पहाडी क्षेत्रको तारासिन नामक एउटा पूरै गाउँ पहिरोमा बगेको थियो।