सोलुखुम्बु- जिल्लामा निरन्तरको वर्षासँगै खसेको पहिरोका कारण दुईवटा वडा कार्यालय भवन उच्च जोखिममा परेका छन्। नजिकका ११ घरपरिवार विस्थापित भएका छन्।
जिल्लाको सोलुदूधकुण्ड नगरपालिका-३ तामाखानी र सोताङ गाउँपालिका-४ का वडा कार्यालय भवन पहिरोको उच्च जोखिममा परेका हुन्। पहिरोका कारण वडा कार्यालयका संरचनासँगै आसपासका बस्तीसमेत जोखिममा परेका छन्।
प्रमुख जिल्ला अधिकारी कमानसिं थापामगरका अनुसार सोलुदूधकुण्ड-३ को वडा कार्यालय भवन गत शनिबार राति गएको पहिरोका कारण जोखिममा परेको हो। यस्तै, सोताङ -४ को वडा कार्यालय भवन केही दिनअघि गएको पहिरोका कारण जोखिममा परेको छ।
“निरन्तर वर्षात् भइरहेकाले जिल्लाका अन्य सरकारी संरचनामा समेत सामान्य क्षति पुगेको छ,” प्रजिअ थापामगरले भने। सोलुदूधकुण्ड नगरपालिका-३ तामाखानीस्थित वडा कार्यालय भवनभन्दा ठीक माथिबाट विस्तार गरिएको सडक क्षेत्रमा पहिरो जाँदा वडा कार्यालयको शौचालय बगाएको छ।
पहिरोका कारण नजिकै रहेको प्रशासनिक भवनसमेत उच्च जोखिममा रहेको वडाध्यक्ष ल्हाक्पागेलु शेर्पाले बताए। उनका अनुसार वडा कार्यालयको माथिल्लो भिरबाट ठूलो पहिरो खसेको छ। पहिरोले सडकसहित आसपासका संरचनामा क्षति पुर्याएको छ भने पहिरो थप विस्तार हुनसक्ने जोखिम छ।
वडा कार्यालयभन्दा माथिल्लो क्षेत्रमा रहेको भिरबाट पहिरो निरन्तर खसिरहेकाले आसपासको भूभाग थप जोखिमपूर्ण बन्दै गएको छ।
त्यसैगरी, सोताङ गाउँपालिका-४ को वडा कार्यालय भवन पनि पहिरोको उच्च जोखिममा परेको छ। पहिरोले वडा कार्यालय परिसरको पर्खाल बगाएको छ। यस्तै, वडा कार्यालय भवन र कर्मचारी आवाससमेत जोखिममा परेका वडाध्यक्ष दीपबहादुर राईले बताए।
पहिरो निरन्तर बढ्दै गएकाले कुनै पनि बेला वडा कार्यालय भवनसमेत तान्न सक्ने अवस्था रहेको उनले जानकारी दिए। वडा कार्यालयभन्दा तल रहेका पाँच घरपरिवार पहिरोका कारण विस्थापित भएका छन्। घर जोखिममा परेपछि उनीहरू सुरक्षित स्थानमा पाल टाँगेर बसिरहेका छन्।