आगो लागिरहेछ
जिमुवाल आँखा, कान
र मुख थुनेर बसिरहेका छन्

उनलाई सुन्‍नु छैन
बोल्नु छैन
हेर्नु छैन

तिमी को हौ उहाँलाई सिकाउने,
बोल भन्‍ने ?
पर्दा पछाडि लुकेका
जिमुवालका चाकरीदारले भने

यतिबेला सबै
खरानी बटुल्ने तयारीमा छन्
आगो निभोस् भन्‍ने चाहना कसैको छैन

घर जले पनि
आफ्नो आसन नजलोस्
जनता रोए पनि
आफ्नो जयजयकार नरोकियोस्

तर, बुझ
आगोले जात छुट्याउँदैन
पद र पहुँच चिन्दैन
आज छिमेकीको घर जलिरहेको छ
भोलि तिम्रो आँगनसम्म
त्यही ज्वाला आइपुग्‍नेछ !

त्यस दिन
आँखा थुनेर बस्‍नेहरू पनि
धुवाँबाट उम्किन सक्ने छैनन्
मुख टाल्नेहरू पनि गुहार माग्‍नेछन्

त्यसैले
समयमै बोल
समयमै सुन
समयमै हेर
नत्र इतिहासले लेख्‍नेछ-
देश जलेको थिएन
मौनता जलेको थियो !