– सन् १९४०- इस्टोनिया सोभियत संघको कब्जामा
सन् १९४० मा आजकै दिन तत्कालीन सोभियत संघले इस्टोनियालाई आफूमा गाभेको थियो। त्यतिबेलासम्म उक्त मुलुक स्वतन्त्र थियो। र, सोभियत संघको पतनपछि पुनः स्वतन्त्र भएको हो।
– सन् १९४५- हिरोसिमामा अमेरिकाले खसाल्यो परमाणु बम
दोस्रो विश्वयुद्धका क्रममा आजकै दिन अमेरिकाले जापानको हिरोसिमामा ‘लिटिल ब्वाई’ नाम दिइएको परमाणु बम खसालेको थियो। औद्योगिक शहर हिरोसिमामा खसालिएको बम विष्फोटबाट १ लाख ५० हजारभन्दा बढीको ज्यान गएको थियो। हिरोसिमापछि नागासाकीमा पनि अमेरिकाले परमाणु बम खसालेको थियो। र, जापानले आत्मसमर्पण गरेको थियो। त्यससँगै प्यासिफिक क्षेत्रको युद्ध अन्त्य भएको थियो।
– सन् १९६२- जमैका ब्रिटेनको पञ्जाबाट मुक्त
सन् १९६२ मा आजकै दिन क्यारेबियन मुलुक जमैका ब्रिटिस पञ्जाबाट स्वतन्त्र भएको थियो। १६औं शताब्दीको शुरुमा उक्त मुलुक स्पेनको कब्जामा परेको थियो। सन् १९५५ मा त्यसलाई तत्कालीन ब्रिटेनले कब्जामा लिएको थियो। ब्रिटिसहरूले त्यहाँ उखु खेती भित्र्याए। र, अत्यधिक नाफा कमाउने उपनिवेश बनाए। र, आजकै दिन ब्रिटिस पञ्जाबाट मुक्त भएर स्वतन्त्र मुलुक बन्यो।
– सन् १९६५- अमेरिकामा मताधिकार कानून कार्यान्वयनमा
सन् १९६५ मा आजकै दिन अमेरिकामा मताधिकार कानून कार्यान्वयनमा आएको थियो। तत्कालीन राष्ट्रपति लिन्डन बी. जोन्सनले मताधिकारका लागि कुनै पनि विभेदविरुद्धको कानून प्रमाणीकरण गरेका थिए। अमेरिकी संविधानको १४औं र १५औं संशोधनमार्फत उक्त कानून निर्माण भएको थियो।
– सन् १९९६- कोरियन एयर दुर्घटनामा मारिए २२८
सन् १९९६ मा आजकै दिन कोरियन एयरको विमान दुर्घटनामा २२८ जनाले ज्यान गुमाएका थिए। अमेरिकाको नियन्त्रणमा रहेको प्रशान्त महासागरीय टापु गुआमको असन-मैनास्थित बिना पिकमा बोइङ ७४७-३०० विमान दुर्घटनामा परेको थियो। उक्त विमान दक्षिण कोरियाको सोलबाट गुआमस्थित अन्तर्राष्ट्रीय विमानस्थलतर्फ जाँदै थियो।
– सन् २०१२- क्युरियोसिटी भेहिकल मंगल ग्रहमा अवतरण
अमेरिकी अन्तरिक्ष अभियान नासाले पठाएको रोबोटिक भेहिकल क्युरियोसिटी आजकै दिन मंगल ग्रहमा अवतरण भएको थियो। त्यसलाई नासाले ‘मंगल विज्ञान प्रयोगशाला’ नाम दिएको थियो। अवतरण भएलगत्तै उक्त भेहिकलले मंगल ग्रहको सतहका तस्बिरहरू धमाधम पठाउन शुरु गरेको थियो।
– सन् २०१९- धर्तिका एक चौथाई मानिस पानी संकटमा
सन् २०१९ मा आजकै दिन प्रकाशित एक रिपोर्टअनुसार धर्तिको एक चौथाई जनसंख्या पानीको चरम संकटबाट गुज्रिरहेको खुलासा भएको थियो। त्यसमध्ये १७ वटा मुलुक सबैभन्दा बढी संकटमा देखिएका थिए। विश्वका ठूला शहरहरू मध्ये दक्षिण अफ्रिकाको केप टाउन, अमेरिकाको लस एन्जलस र भारतको बैंगलोर पानीको सबैभन्दा बढी संकटमा देखिएका थिए। उक्त रिपोर्ट ‘वर्ल्ड रिसोर्सेस इन्स्टिच्युट’ले तयार पारेको थियो।
– सन् २०२३- पाकिस्तानी रेल दुर्घटनामा ३० मारिए
सन् २०२३ मा आजकै दिन पाकिस्तानको सिन्ध प्रान्तस्थित नवाबशाह शहरमा एक रेल लिकबाट बाहिरिँदा ३० जनाको ज्यान गएको थियो। रेलमा सवार अन्य ६० जना घाइते भएका थिए।
– सन् २०२४- रुसमाथि युक्रेनको भयानक आक्रमण
सन् २०२४ मा आजकै दिन युक्रेनले रुसको कुर्स्क क्षेत्रमा १ हजार सैनिक र ट्यांकहरू सहित भयानक आक्रमण गरेको थियो। रुसले युक्रेनमाथि अत्याचारपूर्ण आक्रमण शुरु गरेयता युक्रेनले रुसी भूमिमा गरेको त्यो सबैभन्दा ठूलो प्रत्याक्रमण थियो।