कैलाली । नेपाल युवा उद्यमी मञ्च कैलालीको अध्यक्षमा युवा व्यवसायी आयुष हमाल सर्वसम्मत निर्वाचित भएका छन्। शुक्रबार धनगढीमा सम्पन्न मञ्चको नवौँ अधिवेशनले हमालको नेतृत्वमा नयाँ कार्यसमिति निर्विरोध चयन गरेको हो।
नवनिर्वाचित कार्यसमितिको प्रथम उपाध्यक्षमा आशिष शाह तथा द्वितीय उपाध्यक्षमा भरत श्रेष्ठ चयन भएका छन्। त्यसैगरी सदस्यहरूमा आयुष मोहपाल, प्रीतम करिया, श्रवण शाह, गोविन्द बोहरा, वीरेन्द्र भट्ट, शौरव भट्टराई, राजनकुमार राना, अमृत जैशी र रुजुल भट्ट सर्वसम्मत चयन भएका छन्। मञ्चको सल्लाहकारमा सुशील पन्त चयन भएका छन्।
निवर्तमान अध्यक्ष अच्युत दाहालको सभापतित्वमा सम्पन्न अधिवेशनमा मञ्चका राष्ट्रिय अध्यक्ष सुदीप घिमिरे प्रमुख अतिथिका रूपमा उपस्थित थिए।
कार्यक्रममा नेपाल उद्योग वाणिज्य महासंघ सुदूरपश्चिम प्रदेशका अध्यक्ष पुष्पराज कुँवर, कैलाली उद्योग वाणिज्य संघका अध्यक्ष पुष्कर ओझा, रक्तदान सदभावना दुत दीपक उपाध्याय, पुर्व अध्यक्ष लगायत व्यवसायी तथा उद्यमीहरूको उल्लेखनीय उपस्थिति रहेको थियो। कार्यक्रमको सञ्चालन सञ्चारकर्मी सीताराम ओझाले गरेका थिए।
नवनिर्वाचित अध्यक्ष हमालले युवा उद्यमशीलता प्रवर्द्धन, व्यवसायिक नेटवर्क विस्तार तथा उद्यमीहरूको क्षमता अभिवृद्धिका लागि मञ्चलाई अझ प्रभावकारी बनाउँदै अगाडि बढ्ने प्रतिबद्धता व्यक्त गरेका छन्।
