चितवन । गत स्थानीय निर्वाचनमा मतपत्र च्यातिएको भरतपुर महानगर वडा नम्बर १९ मा एमाले विजयी भएको छ । उक्त वडामा अध्यक्ष नेकपा एमालेका उम्मेदवार प्रकाश तामाङ विजयी भएका हुन् ।

तामाङले नेपाली कांग्रेसका उम्मेदवार द्रोण गुरुङलाई पराजित गरेका हुन् । पाँच वर्षअघिको स्थानीय तह निर्वाचनको मत गणनाका क्रममा माओवादी केन्द्रका कार्यकर्ताले यही वडामा मतपत्र च्यातेका थिए । पछि सर्वोच्च अदालतको आदेशमा पुनः मतदान भएको थियो ।

त्यतिबेला यस वडामा माओवादी केन्द्रकी उम्मेदवार रेनु दाहालले १५४४ मत पाएकी थिइन् । यस्तै, एमालेका देवी ज्ञवालीले १०३२ मत पाएका थिए ।

तत्कालीन अवस्थामा माओवादी केन्द्रका गणक प्रतिनिधि मधु न्यौपाने र द्रोण सिवाकोटीले मतपत्र च्यातेका थिए । सिवाकोटी अहिले माओवादी केन्द्र चितवनका सचिवमा छन् ।