एकाबिहानै झिसमिसेमा
अर्धनिद्रामै बडका भलमन्सा
मुखमा दाँतुन चेपेर चर्पीतिर लम्कँदै थिए
ढोकैमा तेर्सिएको गाडीमा
बजारिन पुगे बड्डा !
अइया बाबै !
कराएको सुनेर ठग्गा दौडिँदै आयो
के भयो काका किन कराएको ?
ए भतिज, अब चर्पी जाने ठाउँमा पनि
गाडी तेर्स्याउने को पापी हो ?
त्यत्तिकैमा युवा नेता तेतराम
मोबाइल लाइभ गर्दै आइपुग्यो
बाजे यो क्रान्तिको नयाँ तरिका हो
काठमाडौंमा यसै गर्छन्
हामीले पनि त्यही गर्ने हो !
बडका भलमन्साले कराए
चर्पीको ढोका छेक्ने पनि क्रान्ति हुन्छ ?
तेतराम मुसुक्क हाँस्यो
अब यो गाडी खेत जाने बाटोमा राख्नेछौं
किसान खेती गर्न नजाऊन् भनेर !
अस्पतालको ढोकामा राख्नेछौं
बिरामी समयमै अस्पताल नपुगून् भनेर !
विद्यालयको गेटमा राख्नेछौं
बालबालिका पढ्न जान नसकुन् भनेर !
कार्यालयको ढोकामा राख्नेछौं
कर्मचारी काम गर्न नपाऊन् भनेर !
यही हो नयाँ आन्दोलन
आफू केही नगर्ने
अरूलाई पनि गर्न नदिने बाजे !
बडका भलमन्साले दाँतुन फाल्दै भने-
नाति जहाँ नियम मर्छ
त्यहाँ गाडी मात्र होइन
देश पनि तेर्सिन्छ !
ठग्गाले मुस्कुराउँदै थप्यो,
काका यिनीहरूले बाटो खोल्ने होइन
बाटो छेक्ने राजनीति सिकेछन्
फरक यति हो गाडी सडकमा तेर्सिन्छ
बुद्धि दिमागमै !