काठमाडौं- आज ८ जुन। विश्‍व इतिहासका अनगिन्ती घटनाले आजको दिन स्मरण गराउँछन्। प्रस्तुत छ, केही विश्‍व चर्चित घटनाको सारसंक्षेप।

– सन् १९८७- न्युजिल्यान्डलाई परमाणुमुक्त क्षेत्र घोषणा

सन् १९८७ मा आजकै दिन न्युजिल्यान्डले आफ्नो मुलुकलाई परमाणुमुक्त क्षेत्र घोषणा गरेको थियो। ‘निशस्त्रीकरण तथा शस्त्र नियन्त्रण ऐन, १९८७’ पारित गर्दै न्युजिल्यान्डले उक्त घोषणा गरेको थियो। उक्त कानूनअनुसार परमाणु ऊर्जाबाट चल्ने जहाजहरूलाई पनि न्युजिल्यान्ड प्रवेशमा रोक लगाइएको थियो। आफ्नो देशलाई परमाणुमुक्त बनाउने न्युजिल्यान्ड पहिलो मुलुक थियो।

– सन् १८८७- हर्मन होलेरिथलाई पन्च कार्ड क्याल्कुलेटरको प्याटेन्ट

सन् १८८७ मा आजकै दिन अमेरिकाका हर्मन होलेरिथलाई पन्च कार्ड क्याल्कुलेटरको प्याटेन्ट प्रदान गरिएको थियो। उनी अमेरिकी डेटा प्रोसेसिङमा पायोनियर हुन्। उनले आफ्नो मेसिनको उपयोग सन् १८९०-९१ मा लिइएको अमेरिकी जनगणनाको डेटा प्रशोधन गर्न उपयोग गरेका थिए।

– सन् २०१८- संसारकै शक्तिशाली सुपर कम्प्युटर सार्वजनिक

सन् २०१८ मा आजकै दिन अमेरिकाको टेनेसीमा संसारको हालसम्मकै शक्तिशाली सुपर कम्प्युटर सार्वजनिक गरिएको थियो। उक्त कम्प्युटरले प्रति सेकेन्ड २ लाख ट्रिलियन गणना गर्न सक्छ। आईबीएम र एनभीडियाले ओक रिज नेसनल ल्याबोरेटोरीमा उक्त कम्प्युटर बनाएका हुन्।

– सन् २०२०- लकडाउनले जोगियो ३० लाख युरोपेलीको ज्यान

कोभिड-१९ महामारीबाट मानिसलाई बचाउन समयमै लकडाउनमा जाँदा युरोपेली मुलुकहरूमा ३० लाख जनाको ज्यान बचेको रिपोर्ट सार्वजनिक भएको थियो। लन्डनस्थित इम्पेरियल कलेजले सार्वजनिक गरेको रिपोर्टमा लकडाउनमा जाने निर्णय बुद्धिमत्तापूर्ण रहेको उल्लेख थियो।

– सन् २०२१- संसारको पाँचौं महासागर

सन् २०२१ मा आजकै दिन नेसनल जोग्राफिकले साउथ ओसनलाई संसारको पाँचौं महासागर घोषणा गरेको थियो।

– सन् २०२३- ट्रम्पविरुद्ध ३४ वटा गम्भीर मुद्दा

अमेरिकी संघीय अभियोजकहरूले पूर्व अमेरिकी राष्‍ट्रपति डोनाल्ड ट्रम्पविरुद्ध ३४ वटा गम्भीर मुद्दा दायर गरेका थिए। रक्षासम्बन्धी जानकारीहरू अवैध रूपमा राखेको, फ्लोरिडास्थित आफ्नो रिसोर्टमा दर्जनौं वर्गीकृत दस्तावेजहरू राखेको र न्यायमा बाधा पुर्‍याएको अभियोगमा उनीविरुद्ध त्यति धेरै मुद्दा दायर भएका थिए। तर, दोस्रोपटक उम्मेदवार बन्‍न उनलाई बन्देज नलगाइएकाले ट्रम्प पुनः राष्‍ट्रपति निर्वाचित भएका छन्।

– सन् २०२४- एकै दिन मारिए २७४ प्यालेस्टिनी

सन् २०२४ मा आजकै दिन इजरायली सेनाले गाजाको मध्य क्षेत्रस्थित नुसेरात शिविरमा चलाएको अपरेसनका क्रममा एकै दिन २७४ जना प्यालेस्टिनी मारिएका थिए। र, अन्य ६९८ जना घाइते भएका थिए। अपरेसनका क्रममा ४ जना इजरायली बन्धकलाई मुक्त गराइएको थियो।