काठमाडौं- आज ६ जुन। विश्व इतिहासका असंख्य घटनाले आजको दिनलाई स्मरण गराउँछन्। प्रस्तुत छ, तीमध्ये केही प्रमुख घटनाको सारसंक्षेप।
– सन् १९३०- पसलमा फ्रोजन फुडको पहिलो बिक्री
सन् १९३० मा आजकै दिन पहिलोपटक पसलमा फ्रोजन फुड बिक्रीमा राखिएको थियो। अमेरिकाको म्यासाच्युसेट्सस्थित स्प्रिङफिल्डमा १८ वटा स्टोरले एकसाथ फ्रोजन फुड बिक्रीमा राखेका थिए। यो उपभोक्ताको प्रतिक्रिया बुझ्ने परीक्षण थियो। बर्डस् आई फ्रोजन फुड कम्पनीका संस्थापक क्लियरेन्स आधुनिक फ्रोजन फुड उद्योगका पिता मानिन्छन्।
– सन् १९८२- लेबनानमाथि इजरायली आक्रमण
सन् १९८२ मा आजकै दिन इजरायली सेनाले लेबनानमाथि आक्रमण थालेको थियो। ३ जुन १९८२ मा बेलायतका लागि इजरायली राजदूत स्लोमो आर्गोभमाथि आक्रमण भएको प्रतिक्रियास्वरूप इजरायलले लेबनानमा हमला गरेको थियो। तीन वर्ष चलेको युद्धमा हजारौं निहत्था सर्वसाधारण मारिएका थिए।
– सन् १९८४- भिडियो पजल गेम सार्वजनिक
सन् १९८४ मा आजकै दिन तत्कालीन सोभियत संघका कम्प्युटर इन्जिनियर एलेक्सी पाजित्नोभले ‘टेट्रिस’ नामक भिडियो पजल गेम सार्वजनिक गरेका थिए। उक्त गेम १० करोड प्रति बिक्री भएको थियो, जुन इतिहासको सर्वाधिक लोकप्रिय भिडियो गेममध्ये एक हो।
– सन् १९९४- चीनमा विमान दुर्घटनामा मारिए १६०
सन् १९९४ मा आजकै दिन चीनको सियानमा विमान दुर्घटनामा १६० जनाको ज्यान गएको थियो। ‘टुपोलोभ- १५४ एम’ विमान सियानबाट ग्वाङ्झाउका लागि उड्नासाथ दुर्घटनामा परेको थियो। विमानमा सवार सबैको ज्यान गएको थियो।
– सन् १९९४- कोलम्बिया भूकम्पमा मारिए १ हजार
सन् १९९४ मा आजकै दिन दक्षिण अमेरिकी मुलुक कोलम्बियामा गएको शक्तिशाली भूकम्पमा परी १ हजारजनाले ज्यान गुमाएका थिए। भूकम्प र त्यसपछि आएको हिम पहिरोमा कोलम्बियाको टोएज क्षेत्र तहसनहस भएको थियो।
– सन् १९९९- ब्राजिलमा जेल तोडेर भागे ३४५ बन्दी
सन् १९९९ मा आजकै दिन ब्राजिलको इतिहासकै ठूलो जेल ब्रेक भएको थियो। घटनामा ३४५ जना बन्दी जेल तोडेर भागेका थिए। त्यसपछि बन्दीको खोजी क्रममा दुई भगौडा मारिए भने ५ निर्दोषलाई जेलमा हालियो।
– सन् २००२- पृथ्वीमा विष्फोट भयो क्षुद्र ग्रह
सन् २००२ मा आजकै दिन पृथ्वीमाथि एक क्षुद्र ग्रह विष्फोट भएको थियो। ग्रिस र लिबियाको बीचमा भूमध्य सागरमाथि विष्फोट भएको क्षुद्र ग्रहको ब्यास करिब १० मिटर थियो। विष्फोटको बल २६ किलोटन रहेको अनुमान छ, जुन जापानको नागासाकीमा विष्फोट गराइएको परमाणु बमभन्दा शक्तिशाली थियो।
– सन् २०१८- चीनमा स्मार्टफोन प्रयोगकर्तालाई अलग्गै बाटो
चीनको सिआन प्रान्तमा आजकै दिन स्मार्टफोन प्रयोगकर्ताका लागि अलग्गै पैदल मार्ग सञ्चालनमा ल्याइएको थियो। स्मार्टफोन चलाउँदै ढिलो गतिमा हिँड्ने पैदल यात्रीका लागि उक्त बाटो प्रयोगमा छ।
– सन् २०२३- अदालत पुग्ने पहिलो बेलायती राजपरिवार सदस्य
सन् २०२३ मा आजकै दिन बेलायतका पूर्व राजकुमार ह्यारीले अदालतमा उजुरी गरेका थिए। उनी १३० वर्षयता अदालतको ढोका ढकढक्याउने शाही परिवारका पहिलो सदस्य थिए। आफ्नो इमेल ह्याक गरेर महत्त्वपूर्ण सूचनाहरू सार्वजनिक गरेको न्युजपेपर मिरर ग्रुपविरुद्ध अदालतमा मुद्दा दायर गरेका थिए।
– सन् २०२४- डिस्फ्रुटार संसारकै उत्कृष्ट रेस्टुराँ
सन् २०२४ मा स्पेनको बार्सिलोनास्थित डिस्फ्रुस्टार रेष्टुराँलाई संसारकै उत्कृष्ट घोषणा गरिएको थियो। त्यस रेस्टुराँका सञ्चालकहरू ओरिओली क्यास्त्रो, एडुआर्ड जाट्रुच र माटेउ क्यासानास हुन्।