काठमाडौं- आज २२ मे। विश्व इतिहासका असंख्य घटनाले देश, क्षेत्र र स्थान विशेषमा आजको दिनको सम्झना ताजा गराउँछन्। प्रस्तुत छ, तीमध्ये केही प्रमुख घटनाको सारसंक्षेप।
– सन् १८४९- एक मात्र आविष्कारक अमेरिकी राष्ट्रपति
अब्राहम लिंकन अमेरिकी राष्ट्रपति मात्र होइनन्। उनको नाममा आविष्कार पनि जोडिएको छ। राष्ट्रपति बन्नुअघि नै उनलाई डुंगा उठाउने उपकरण आविष्कार गरेवापत त्यसको प्याटेन्ट प्रदान गरिएको थियो। त्यसयताका कुनै राष्ट्रपति आफ्नै आविष्कारका कारण चिनिएका छैनन्।
– सन् १९०६- राइट ब्रदर्सलाई फ्लाइङ मेसिनको प्याटेन्ट
आधुनिक जहाजका आविष्कारक राइट ब्रदर्सलाई आजकै दिन फ्लाइङ मेसिनको प्याटेन्ट प्रदान गरिएको थियो।
– सन् १९६०- चिली भूकम्पमा गयो ६ हजारको ज्यान
सन् १९६० मा दक्षिण अमेरिकी मुलुक चिलीमा गएको भूकम्पमा परी ६ हजार जनाले ज्यान गुमाएका थिए। ९.५ रेक्टर स्केलको आधुनिक संसारमा गएका ठूला भूकम्पमध्ये एक हो।
– सन् २०१०- एयर इन्डिया विमान दुर्घटनामा गयो १५८ को ज्यान
सन् २०१० मा आजकै दिन भारतको मंगलोर अन्तर्राष्ट्रीय विमानस्थलमा एयर इन्डियाको बोइङ-७३७ विमान दुर्घटनामा परेको थियो। घटनामा १५८ जना मारिएका थिए। एयर इन्डिया एक्सप्रेसको उडान नम्बर ८१२ को विमान मंगलोरमा अवतरण क्रममा ओभरसुट गर्नुपरेको थियो। तर, विमानले आवश्यकताअनुसार उचाइ लिन सकेन र भीरमा पुगेर ठोक्कियो।
– सन् २०११- समुद्री तुफानमा गयो १६० को ज्यान
सन् २०११ मा आजकै दिन अमेरिकाको इतिहासमै शक्तिशाली समुद्री तुफान आएको थियो। उक्त तुफानले मिसौरी राज्यमा १६० जनाको ज्यान लिएको थियो।
– सन् २०१२- विश्वको दोस्रो अग्लो टावर सर्वसाधारणलाई खुला
जापानमा निर्मित विश्वको दोस्रो अग्लो टावर सन् २०१२ मा आजकै दिन सर्वसाधारणका लागि खुला गरिएको थियो। उक्त टावर जापानको राजधानी टोकियोमा अवस्थित छ। ६४३ मिटर अग्लो यो टावर दुबईको बुर्ज खलिफापछि दोस्रो अग्लो संरचना हो। रेडियो र टेलिभिजनको सिग्नल व्यापक बनाउन यो टावर निर्माण गरिएको हो।
– सन् २०१७- अन्तरिक्षमा जन्मिए मुसा
जापानका वैज्ञानिकहरूले आजकै दिन अन्तर्राष्ट्रीय स्पेस स्टेसन (आईएसएस)मा मुसाहरूलाई जन्म दिन सफलता पाएका थिए। आईएसएसमा पुर्याइएको फ्रिज-ड्राई शुक्राणुमार्फत उक्त सफलता प्राप्त भएको थियो। जापानको यामानासी विश्वविद्यालयका वैज्ञानिकहरूले उक्त अभ्यास गरेका थिए।
– सन् २०२०- पाकिस्तानी विमान दुर्घटनामा १०१ को मृत्यु
सन् २०२० मा आजकै दिन पाकिस्तान इन्टरनेसनल एयरलाइन्सको विमान दुर्घटनामा १०१ जनाले ज्यान गुमाएका थिए। एयरबस-३२० विमान कराँचीको जिन्ना अन्तर्राष्ट्रीय विमानस्थलको धावनमार्ग नजिकै दुर्घटनामा परेको थियो। उक्त इलाका अत्यधिक भीडभाडयुक्त छ। घटनामा २ जना बाँच्न सफल भएका थिए।
– सन् २०२३- अमेरिकामा पानी बचाउने सम्झौता
सन् २०२३ मा आजकै दिन अमेरिकाका ३ वटा राज्यले पानी बचाउनेसम्बन्धी एक सम्झौता गरेका थिए। कोलोराडो नदीको पानीको प्रयोग कटौती गर्ने उक्त सम्झौताको उद्देश्य सन् २०२६ सम्ममा ३० लाख एकड-फिट पानी बचाउनु थियो। सम्झौतामा क्यालिफोर्निया, एरिजोना र नेभाडा राज्यका अधिकारीहरू सहभागी थिए।
– सन् २०२४- ३ युरोपेली देशले दिए प्यालिस्टिनलाई मान्यता
सन् २०२४ मा आजकै दिन युरोपेली मुलुकहरू आयरल्यान्ड, नर्वे र स्पेनले प्यालिस्टिनलाई स्वतन्त्र राष्ट्रको मान्यता दिएका थिए। अन्य ९ वटा युरोपेली मुलुकले पनि उनीहरूलाई साथ दिएका थिए।