काठमाडौँ । निर्माण व्यवसायीहरूको छाता संस्था नेपाल निर्माण व्यवसायी महासंघ (एफक्यान) को २६औँ साधारण सभा तथा १३औँ अधिवेशनअन्तर्गत चुनावी प्रक्रिया राजधानीको नेपाल प्रज्ञा प्रतिष्ठान, कमलादीमा सुरु भएको छ ।
निर्वाचन तालिका अनुसार बिहान ८ बजेदेखि मतदान सुरु हुने भनिए पनि मतदानस्थल वरिपरि रहेका प्रचारप्रसार सामग्री पूर्ण रूपमा नहटाएसम्म प्रक्रिया अघि बढाउन नसकिने मुख्य निर्वाचन अधिकृत टंक प्रसाद दुलालले जानकारी दिए । आवश्यक व्यवस्थापन पूरा भएपछि मात्र मतदान प्रक्रिया अघि बढाइएको जनाइएको छ ।
मतदानस्थलमा कडा सुरक्षा व्यवस्था मिलाइएको छ । प्रतिनिधिबाहेक अन्य व्यक्तिलाई प्रवेश निषेध गरिएको छ भने मतदान दिउँसो २ बजेसम्म जारी रहने निर्वाचन समितिले जनाएको छ ।
यस अधिवेशनमा महासंघका सल्लाहकार निकोलस पाण्डे तथा वरिष्ठ उपाध्यक्ष ई. आङ दोर्जी लामा (ए.डी.) नेतृत्वको समूह चुनावी मैदानमा उत्रिएका छन् । अध्यक्षसहितका प्रमुख पदहरूमा कडा प्रतिस्पर्धा हुने देखिएको छ भने केही पदाधिकारी तथा सदस्य पदमा समेत थप उम्मेदवारी परेको निर्वाचन मण्डलले जनाएको छ ।
महासंघको नयाँ नेतृत्व चयनका लागि भइरहेको यो निर्वाचनलाई व्यवसायीहरूबीच निकै चासोका साथ हेरिएको छ ।
