भारतीय राष्ट्रिय कंग्रेस (कंग्रेस-आई)का पूर्वअध्यक्ष राहुल गान्धीले जनतासँग पार्टीको सम्पर्क टुटेको स्वीकारेका छन्। पार्टीद्वारा आयोजित ‘नव संकल्प शिविर’लाई सम्बोधन गर्दै पहिलोपटक राहुलले ‘कन्फेसन’ गरेका हुन्।
र, उनले जनतासँगको सम्पर्क स्थापित गरेर मात्र पार्टी अगाडि बढ्न सक्ने उनले बताए। ‘हामीले बिना केही सोचेरै जनताका बीचमा जानु जरुरी देखियो। उनीहरूको समस्या बुझ्न आवश्यक देखियो। र, उनीहरू कसरी पार्टीसँग जोडिन सक्छन् भनेर खोजी गर्नुपर्ने भयो,’ उनले भने, ‘कंग्रेस पार्टीले मात्र देशलाई अगाडि बढाउन सक्छ भनेर जनतालाई बुझाउनुपर्ने भयो।’
आफ्नो पार्टी अब जनताका बीचमा जाने र विभिन्न यात्रामा सहभागी हुने उनले बताए। अक्टोबरदेखि जनताका बीच पुग्ने यात्रा प्रारम्भ हुने उनले घोषणा गरे।
‘यो काम सर्टकटबाट होइन, पसिना बगाएर मात्र हुन सक्छ। हामीसँग पसिना बगाउने क्षमता छ। एकपटक फेरि जनताका बीचमा जाऊँ,’ उनले भने।
सन् २०१४ मा भाजपा सत्तामा आएयता भारतीय राष्ट्रिय कंग्रेस कमजोर देखिँदै आएको छ। न केन्द्र, न त प्रदेशहरूमै कंग्रेस बलियो छ। खाली भाजपालाई गाली गर्नमै उक्त पार्टीका नेताहरूको दैनिकी बित्दै आएको छ। पहिलोपटक राहुलले जनसम्पर्क टुटेकामा चिन्ता जनाएका हुन्।
