काठमाडौँ । हत्या आरोपमा आगामी शुक्रबार हुने निर्वाचनमा नेकपा माअोवादी केन्द्रका वडाअध्यक्षका उम्मेदवारसहित तीन जना पक्राउ परेका छन् ।
रुकुम पूर्वको पुथाउत्तरगंगा गाउँपालिका ११ का वडाध्यक्ष जयकुमार बुढा, आगामी निर्वाचनमा वडाध्यक्ष पदका उम्मेदवार कुमार सिंह बुढा र उनीहरूका भाइ अर्जुन बुढालाई प्रहरीले नियन्त्रणमा लिएको हो । हत्या आरोपमा जनप्रतिनिधिसहित तीन जना पक्राउ परेका हुन् ।
गत १९ गते स्थानीय टक्सेरा गाउँमा निर्वाचन प्रचार प्रसारका क्रममा भएको विवाद मिलाउन पुगेकी स्थानीय ३९ वर्षकी डुथी बुढा भन्ने जुङमाया बुढालाई वडाध्यक्षसहित तीन जनाले अपहरण गरी लगेका थिए ।
अपहरण परेकी बुढाको शव फेला पारेको थियो । महिलाको कानमा रगत बगेको र निर्वस्त्र अवस्थामा शव फेला पारिएको रुकुम जिल्ला प्रहरीले जनाएको छ ।
नेपाली कांग्रेस र नेकपा एमालेबीच गठबन्धन भएको उक्त गाउँपालिकामा माओवादी केन्द्रसँग विवाद हुँदै आएको थियो ।
मृतक बुढाको शव लुम्बिनी प्रादेशिक अस्पताल बुटवलमा लगिएको प्रहरीले जनाएको छ । घटनाबारे थप अनुसन्धान भइरहेको छ ।
