सुनसरी- ०७४ सालको पालिका चुनावमा सुनसरी बराहक्षेत्र नगरपालिका वडा नम्बर १ बाट कांग्रेसका वडाध्यक्ष उम्मेदवार सुरेश श्रेष्ठले ११ सय ५९ मत प्राप्त गरी विजय हासिल गरेका थिए। त्यतिबेला उनको प्यानलले नै जितेको थियो। उनका निकटतम प्रतिद्वन्द्वी एमालेका उम्मेदवार खडक कटुवालले ४४१ मत प्राप्त गरी दोस्रो स्थान हासिल गरेका थिए।
यसपटक पनि कांग्रेसले वडाध्यक्ष श्रेष्ठलाई नै दोहोर्याएको छ। उनी कांग्रेसको क्षेत्रीय प्रतिनिधि पनि हुन्। सुरेश श्रेष्ठ आफ्नो राजनीतिक विरासत कायम गर्दै पुनः वडाध्यक्ष सहित सबै सदस्यमा जित निकाल्ने लक्ष्यका साथ चुनावी मैदानमा घरदैलो अभियानमा होमिएका छन्।
एमालेले पनि युवा नेता किसन मगरलाई वडाध्यक्ष उम्मेदवार बनाएको छ। उनी एमाले नगर कमिटी सदस्य तथा वडा इन्चार्ज पनि हुन्। उनको एउटै लक्ष्य देखिन्छ, कांग्रेसको विरासत भत्काउने र वडाध्यक्ष, सदस्यसहित प्यानल नै जित्ने। यही दाउका साथ उनी पनि घरदैलो अभियानमा लागिपरेका छन्।
यसपटकको चुनावमा वडाध्यक्षका दाबेदारसुरेश श्रेष्ठ र मगर मात्र छैनन्, राप्रपाका हर्कबहादुर खड्का तथा स्वतन्त्र रञ्जित लोहनी पनि चुनावी मैदानमा छन्। यसपटकको वडा नम्बर १ को चुनावमा कांग्रेस र माओवादी केन्द्रबीच गठबन्धन छैन।
रञ्जित लोहनीले माओवादीको तर्फबाट वडाध्यक्ष उम्मेदवार दाबी गरेका थिए। पार्टीबाट टिकट नपाएपछि उनी स्वतन्त्र उम्मेदवार बनेका छन्। एमाले, राप्रपा र स्वतन्त्र उम्मेदवारको तुलनामा कांग्रेसका श्रेष्ठ चतुर र अनुभवी नेता मानिन्छन्।
त्यसैले सबै चुनावी अस्त्र प्रयोग गरेर आफूसहित प्यानललाई नै जिताउने ध्याउन्नमा देखिन्छन्, उनी। राप्रपा र स्वतन्त्र उम्मेदवार दुवैले भोट काटिदिने जोखिममा श्रेष्ठ र मगर छन्। तथापि, मुख्य प्रतिस्पर्धा यो वडामा कांग्रेस र एमालेबीचमै छ। श्रेष्ठ र मगरमध्ये कसले वडाध्यक्षमा जित निकाल्न भन्ने जानकारी मत परिणामबाट मात्र प्राप्त हुनेछ।