काठमाडौं- काभ्रे रोशी गाउँपालिका-११ डाला बेशीस्थित सडकमा यूपी ५८ टी ८१८१ नम्बरको मिनी बस र ना.१ ज ४२१० नम्बरको सुमो एकआपसमा ठक्कर खाई बुधबार दिउँसो दुर्घटना हुँदा ५ जनाको मृत्यु भएको छ । मृत्यु हुनेहरुमा सुमोमा सवार रामेछाप चिसापानी नगरपालिका-८ घर भएकी ३५ वर्षीया सम्झना भुसाल, उनकै छोरा ७ वर्षीय संगित भुसाल, सिन्धुली कमलामाई नगरपालिका-७ बस्ने ३१ वर्षीय बिक्रम श्रेष्ठ, सिन्धुली सुनकोशी गाउँपालिका-१ की ४४ वर्षीया प्रमिला नेपाली र कमलामाई नगरपालिका-४ बस्ने सुमो चालक ४५ वर्षीय हरि बहादुर बल रहेका छन् । दुर्घटनामा गम्भीर घाइते भएका उनीहरुको धुलिखेल अस्पतालमा उपचारको क्रममा मृत्यु भएको हो । दुर्घटनामा घाइते भएका अन्य १८ जनाको सोही अस्पतालमा उपचार भइरहेको  छ । घाइतेमध्ये २ जनाको अवस्था गम्भीर रहेको छ भने अन्यको अवस्थामा सामान्य रहेको छ ।

बर्दिया ठाकुरबाबा नगरपालिका-१ सिंह बाहिनी चोक नजिक सडकमा रा.१ ख १८३ नम्बरको ट्रकमा भे.१ स ९५६२ नम्बरक ई-रिक्सा ठक्कर खाई बुधबार दिउँसो दुर्घटना हुँदा रिक्सामा सवार ठाकुरबाबा नगरपालिका-२ रानीपुर बस्ने ४९ वर्षीया पिउली धितालको मृत्यु भएको छ । दुर्घटनामा गम्भीर घाइते भएकी उनको स्थानिय अस्पताल ठाकुरबाबा पोलिक्लिनिक भुरिगाउँमा उपचारको क्रममा मृत्यु भएको हो ।  ट्रक चालक र ई रिक्सा चालकलाई प्रहरीले नियन्त्रणमा लिएको छ ।