सुनसरी- सप्तकोसी नदीले बर्सेनि दु:ख दिँदै आएको बराहक्षेत्र सुनसरी स्थित चतरादेखि राजाबाससम्म भारत सरकारले यस वर्ष पनि बर्खा अगावै तटबन्ध निर्माणको काम थालेको छ।
तारजाली र बोराबाँधको काम गर्दै आएको कोसी प्रोजेक्ट अन्तर्गत बिहारको जल संशाधन विभागले नेपालमा नयाँ प्रविधि कन्क्रिट टेट्रापोड्स लगाउनका लागि निर्माणको काम सुरु गरेको हो।
इन्जिनियर अशोककुमार मण्डललाई उद्धृत गर्दै स्थानीय कामको रेखदेख गर्दै आएका मनोज कट्वालका अनुसार कोसी नदीको कटान रोक्न बराहक्षेत्र-२ स्थित पुल्ठेगौंडामा २५ सय कन्क्रिट टेट्रापोड्स लगाइँदैछ।
पुल्ठेगौंडास्थित १२ नम्बर स्परको सुरक्षाका लागि लगाउन लागिएको टेट्रापोड्स निर्माणका लागि ५८ हजार बोरा सिमेन्ट लाग्नेछ । स्थानीय नागरिकको साढे ३० कट्ठा जग्गा तीन महिनासम्मका लागि प्रति कट्ठा २० हजार रुपैयाँमा लिजमा लिएर काम सुरु गरिएको छ। काम सक्न तीन महिना समय लाग्ने बताइएको छ।
विशेष गरी समुद्रमा देखिने यस्ता टेट्रापोड्स नेपालमा कोसी नदीमा पहिलो पटक लगाउन निर्माणको काम थालिएको स्थानीय प्रतिनिधि कट्वालको भनाइ छ । उनका अनुसार ३८ वटा फर्माबाट निर्माणको काम तीव्र गतिमा थालिएको छ।