काठमाडौं उपत्यकामा क्यूआर कोड स्क्यान गरेरै ट्राफिक नियम उल्लंघनवापतको जरिवाना तिर्न सकिने भएको छ।
‘क्यू आर स्क्यान, पे फाइन एन्ड विथ्ड्र डकुमेन्ट’को सुविधा शुरु गरिएको उपत्यका ट्राफिक प्रहरी कार्यालयले जनाएको छ। उक्त कार्यालय र कुमारी बैंकबीच सहकार्यबाट प्रविधि जडान गरी जरिवाना तिर्ने प्रक्रियालाई सहजीकरण गरिएको हो।
कार्यालयले बिहीबार उक्त सेवा शुरु गरेको छ। त्यससँगै जरिवाना रकम तिर्न बैंक खोज्दै भौंतारिनुपर्ने वा नगद पैसा बोकेर बैंकमा घण्टौं लाइनमा बस्नुपर्ने बाध्यता अन्त्य भएको छ।
ट्राफिक नियम उल्लंघन गरेवापत सेवाग्राहीले आफ्नो डिजिटल वालेट वा मोबाइल बैंकिङ एपमार्फत मनिटरको स्क्रिनमा देखिएको क्यूआर कोड स्क्यान गरी तोकिएको जरिवाना तिरिसकेपछि तुरुन्तै आफ्नो कागजपत्र लिन सक्ने उपत्यका ट्राफिक प्रहरी प्रमुख एसएसपी उमेशराज जोशीले बताए। ट्राफिक व्यवस्थापनमा नयाँ नयाँ प्रविधिको अधिकतम प्रयोगलाई बढाउँदै लगिएको र यसबाट आम सडक प्रयोगकर्ताहरूलाई थप सहज, सरल, छिटो र भरपर्दो भएको उनले उल्लेख गरे।